Phah hikai ri Ngap ka CSR-Star Cement 25 ngut ki paidbah ka Narpuh sha RRTC Centre

Khliehriat, Nailar, 27: Ka tnat CSR jong ka company Star Cement Lumshnong ka la phah ar phew san ngut ki briew kiba na ka thaiñ Narpuh, East Jaiñtia Hills District ba kin shah hikai ha Rural Resource and Training Centre (RRTC) ha Umran, Ribhoi District, la ai jinghikai ïa ki ban ri ngap. Kiba shah jied ki dei kiba na ka shnong Brishyrnot, Khaddum, Pandare, Sailkan bad Lumshnong, kane ka jingai jinghikai ka dei kaba saw sngi lynter kata naduh ka 21 tarik haduh 24 tarik mynta u bnai naikar 2024.
Ka jingthmu jong ka tnat CSR ka long ban kyntiew Ïa ka ioh ka kot jong ki nongrep jong ka thaiñ bad kitei ki ar phew san ngut ki nongrep ki dei ruh kiba don ka jingsngew tynnad ban ri ngap bad ha RRTC Unran ruh la jinghikai ruh halor ka rep ka riang kaba ha ka juk thymmai, ha ka sngi ba kut ka jingshah hikai, kitei kiba shah hikai ki la ioh ar tylli ki synduk ban ri ngap lem bad kiwei kiwei ki tiar ba donkam kiba kim donkam ban siew pisa.
Na ka liang u Manager CSR of Star Cement, Lumshnong, u K.K.Borah, u la ong ba ka company Star Cement Lumshnong lyngba ka tnat CSR kan ïai bteng ban ai ki jingkyrshan ïa ki nongrep jong ka thaiñ bad kaba kum kane ka kam ri ngap ruh kan iarap shibun ban kyntiew ïa ka ioh ka kot jong kitei ki nongrep “Kane ka synjam kam dei ruh tang ban pynkup bor ne kyrshan ïa ki nongrep, hynrei ka thong ka long ruh ban pynheh bad pyniar shuh shuh ïa ka rep ka riang ha ka thaiñ ban kyntiew ïa ka kam khaïi jong ki ha ka rep ka riang ha ka thaiñ bad ka company Star Cement ka shim ïa kane ka synjam ka long ruh ka jingthmu ban pynbha ïa ka mariang ha ka thaiñ lyngba ka rep ka riang.