Per ki dohkha ïap ha Wah Apha, suba ka ENBFA ba ber dawai bih ki mynder na ka ri Bangladesh

Khliehriat, Nailur, 22: Ki rawon kiba don hapoh ka shatri jong ka Eastern Narpuh Border Fishing Association (ENBFA) ki la pynpaw ïa ka jingsngewsih kaba jur namar ka jingïap pathar jong ki dohkha ha wah Apha ha kawei ka thwei ba ju khot ka thwei Thlen, kaba don ha Umkiang, Narpuh East Jaiñtia Hills District.
Ka Association ka suba jur ba ka jingïap jong kine ki dohka ka dei ka jingtheh dawai bih da ki briew na ka ri Bangladesh.
Ka jingsuba jur jong ki dkhot ka Association ka dei namar haba ki dkhot ki la ïaid ter ter na ki rud jong ka wah ki la lap san tylli ki bilor dawai bih kiba la ithuh shai ba ki dei ki bilor dawai na ka ri Bangladesh bad la sngewthuh ba ki runar ki la pyndonkam ban theh da ki dawai bih ban pynïap dusmon ïa ki dohkha ha ka wah Apha.
Ha ka jingïakren bad lad pathai khubor, u President jong ka ENBFA u Bah Fin Surong, u la ïathuh ba ma u lem bad ki dkhot tang shu ïoh jingtip ïa kane ka jingper jong ki dohkha kiba la ïap ha wah Apha, mar mar ha ka por kumba 6:00 baje mynstep ki la hiar sha wah bad ki la sakhi ruh ïa kane ka jingïap jong ki dohka bad ka jingper ki dohkha ha sla um kaba pynmih ruh ïa ka jingsma iwli kaba shyrkhei bha.
“Ka jingleh dusmon jong ki mynder na ka ri Bangladesh ka la pynduh mynsiem ïa ki nongshong shnong jong ka thaiñ khamtam ïa ka shnong Umkiang, Pyrtakuna bad Kuliang kiba dang hap hapoh ka jingkhmih jong ka Association. Nga pynrem jur ïa ki riewshimkabu kiba la wan pynjot ïa kane ka wah bad pynïap ïa ki dohkha,” ong u Bah Surong.
U la kynthoh jur ruh da kaba ong, “imat kane ka lah ban dei ka jingleh dusmon da ki briew na ka ri Bangladesh kiba don jingmut ban wan rung tuh sha u pud u sam jong ka ri India na ki jaka khlaw, kiba don hajan ka wah Apha namarba la ju lap bunsien ba ki mynder na ka ri Bangladesh ki ju wan rung tuh lyngba ki khlaw ki btap bad ki jam sha shiliang ka wah Apha bad rung sha India. Hynrei mynta ba ki la bun ki briew napoh ka thaiñ kiba najan bad kiba najngai ki ju leit khwa dohkha sha ka wah Apha imat ki mynder na ka ri Bangladesh kim sngew ïohlad shuh ban wan rung tuh kumta ki la leh da kine ki kam dusmon.”
U la ïathuh ba ka Association na ka por sha ka por ka ju wad ïa ki lad ki lynti ban pynneh pynsah ïa ki um ki wah bad ki dohum kiba don ha ki wah bad ka Association kan ïaid buddien ïa kane ka jingwan leh dusmon ha kane ka wah.
Ka Association ka pynrem jur ïa kane ka jingjia bad khamtam eh ka pynrem ruh ïa ki shipai Border Security Force (BSF) ki bym shym la lah satia ban tehlakam bad ban pyrkhing ïa ka jingwan rung tuh ki mynder na ka ri Bangladesh.