Peit lem ïa ki jingeh ki samla pule ka constituency jong phi, ong u MDC BJP ïa u Myntri

Shillong, Rymphang 11 : U MDC ka BJP na Tura, u Bernard N Marak u la kyntu ïa u Myntri ka tnad Pule Puthi ka sorkar Jylla, u Rakkam A Sangma ba un tuklar lang halor ki jingeh ba kynduh da ki samla pule jong ka Rongara – Siju constituency kaba dei ka constituency jong u Myntri hi.
Ha ka shithi sha u Myntri, u MDC u la ïathuh ba u la leit ban jngoh ïa ka constituency jong une u Myntri ha ka taiew ba la dep bad la pyntip ïa u ba bun ki skul sorkar ha kane ka constituency ki la jot lut.
U ong ruh ba bun ki skul kim don shuh tang ka tnum ruh nalor ba kim don ruh ïa ki jaka leit bar lane ka umbam umdih kiba biang na bynta ki samla pule. La kdew ruh ba bun ki skul kim don ïa ki jingkhang, ki blackboard bad ki ben ha kaba bunsien ki blang ki ïoh rung shapoh.
U MDC u ong ruh ba ki samla pule ha ka thaiñ ki ujor shaphang ki jingeh ba ki kynduh ha ka por slap khamtam eh ha kito ki jaka ba don ki jingkieng ba shu pun na shilliang sha shilliang ka la shah rong noh ha ka jingshlei um ha u snem 2022.
“Ïa kine ki jingkieng ym pat maramot haduh mynta ruh bad kane ka la buh jingeh haduh katta katta ïa ki samla pule ka thain ha ka por slap,” u la ong. Nalorkata, u ong ruh ba ki paidbah ki ïathuh ruh ba kane ka jingbuhteng ka lah ban buh ïa ka jingim ki khynnah skul ha ka jingma namar ki bapli ki hap ban shu jngi ha ki wah ban poi sha ki skul lane ki lah ban duh skul ha ka por slap.
Da kaba kam ba ka pule puthi ha ki nongkyndong la shu ieh beiñ u MDC u la ong, “Nga kwah ruh ban kdew ba wat u khaw ba pynpoi sha ki lyngba ka skim ja sngi PM Poshan u dei u bym biang ha ki katto katne ki skul kaba dei kaei kaei kaba sngewkhia bha.”
Shuh shuh u la ong ba u kwah ban kyrpad ban peitngor lem bad kyntiew ïa ka jingdonkam jong ki samla pule kumjuh ïa ki nonghikai. “Nga kwah ruh ban kyrpad ba phin pyllait noh ïa ka tulop jong ki nonghikai ha ka por kaba biang. Kane hi kan ïarap ïa ki samla pule jong ka jylla bad kumjuh ïa ki skul sorkar ba kin kiew lang sha kata ka kyrdan bad kiwei kiwei ki skul.” u la bynrap biang.
Nalorkane, u MDC u la kynnoh ruh ba ka jingkyrshan pisa ïa ki samla pule (scholarship) kadei kawei pat ka jingeh kaba haduh mynta ym pat lah satia ban weng bad halor kane u kyntu ïa u Myntri ba un thaw da ka komiti ka ban peit halor kane ka kam.