Peit bñiah u Myntri Kam Pohïing ka Sorkar Pdeng, ïa ka jingpyntreikam ïa ka ‘Vibrant Villages Programme’
![](https://mawphor.com/wp-content/themes/mawphor/images/default-thumb/publisher-lg.png)
New Delhi, Naitung 17: U Myntri Kam Pohiing bad Cooperation jong ka Sorkar Pdeng, Amit Shah u la peit bñiah ïa ka jingpyntreikam ïa ka “Vibrant Villages Programme” ha ka jingïalang ha New Delhi mynta ka sngi.
Ha kane ka jingïalang, u Myntri Kam Pohiing jong ka Sorkar Pdeng u la ong ba ka Sorkar Indïa hapoh ka jingïalam jong u Myntri Rangbah duh, Narendra Modi, ka ieng shem ban kyntiew ïa ki shnong khappud jong ka ri ha baroh ki lïang.
U Shah u la ban jur halor ka jingdonkam ban plie ki lad ioh kam na ka bynta ki nongshong shnong jong ka thain bad kyntiew ïa ki lad jingpynïasoh ban ïada ka jingmih ki briew na kine ki shnong khappud.
U Amit Shah u la ong ba dei ban pynshlur ïa ki Central Armed Police Forces (CAPF) bad ki shipai kiba don ha kylleng kine ki shnong khappud ba kin thied ïa ki mar rep ba don ha ka thain bad ki tïar shna kti lyngba ki cooperative. U la ong ba ki lad jingsumar jong ki shipai bad ki CAPF dei ban pynbïang na ka bynta ka jingmyntoi jong ki nongshong shnong ha ki shnong ba marjan.
U Myntri Kam Pohiing bad Cooperation jong ka Sorkar Pdeng, Amit Shah u la ban jur halor ka jingpyndonkam pura ïa ka bording solar bad kiwei kiwei ki tyllong ba lah ban pynthymmai kum ka lyer bad kiwei kiwei.
U Myntri Kam Pohiing u la bthah ban bteng ïa ki sienjam jong ki myntri bad ki ophisar ban sngewthuh kham bha ïa ki jingeh jong ki shnong khappud hapoh ka Vibrant Villages Programme.
Haduh mynta, la pynlong palat 6000 tylli ki prokram ha kine ki shnong khappud, ba kynthup kumba 4000 tylli ki kam ai jingshakri bad ki awareness camp. La sanction palat 600 tylli ki projek da ka sorkar Indïa na ka bynta ki lad ioh kam ha kine ki shnong. Ha kane ka jingïalang, u Myntri Kam Pohiing u la ban jur halor ka jingpeit bnïah kaba man ka por ban pynbeit ïa ki jingeh ba dang sahteng.
Hapoh ka skhim ‘Vibrant Villages Programme’, 136 tylli ki shnong khappud ki la ioh haduh 113 tylli ki projek ba dei bad ka surok ha ka jinglut kaba T. 2,420 klur. La pyntreikam ruh ïa ka connection 4G ha kine ki jaka bad shuwa u bnai Nohprah 2024, baroh ki shnong hapoh ka Vibrant Villages Programme kin ioh ïa ka network 4G. La shim ïa ki sienjam ban pynthikna ka jingkynthup ïa baroh ha ki kam pisa ha baroh kine ki shnong bad ka Indïa Post-Payment Banks (IPPB).
Ka kam ka dang ïaid ban kyntiew ïa ki jaka jngoh kai ban pynitynnad ïa kine ki Vibrant Village bad kyntiew ïa ka kam jngoh kai. Ha kane ka kam, la kyntiew ïa ka bor treikam bad ki jingdon jingem kiba ïadei bad ka kam jngoh kai ha ka jingïatreilang bad ka tnad Kam Jngoh Kai.
Hapoh ka jingïalam jong u Myntri Rangbah Duh, Narendra Modi, kane ka skhim kaba kongsan ka dei kaba la sdang ha ka 14 tarik u Rymphang, 2023 ha kaba la mang T 4800 klur.
Ha kane ka jingïalang la wan ïashim bynta da ki ophisar jong ka tnad Kam Poh Iing ba kynthgup u Secretary ka Tnad Kam Poh Iing jong ka Sorkar Pdeng, Secretary, Border Management bad Director General, Indo Tibetan Border Police (ITBP)