Peit bniah bha ïa ki lain bording ban lait na ka shah lympat bording : Ong u Dr. Mukul ha Iing Dorbar

Shillong, Lber 12 : U Nongïalam ka Liang Pyrshah, Dr. Mukul Sangma u la dawa ba dei ban da bishar bniah bha ïa baroh ki laiñ sam bording khnang ban lait na ki jingjia shah lympat bording ha ka jylla.
Haba pynpaw ïa kane ha ki kynta kylli jingkylli ha Iing Dorbar Thawain ka Jylla, u Dr.Mukul u la u la pan ruh ka jingpynthikna na ka sorkar ban pynthikna ba kan don ka jingpeit bniah ïa baroh ki lain sam bording. U ong ba kane ka long ban pynthikna ïa ka jingshngain jong ki trai jaka bad ki nongrep, namar bunsien kine ki dei ki jaka ba kum kine ki jingjia ki jia.
Ha ka jubab, u Myntri ka tnad Bording AT Mondal u la pynthikna ban peit bniah ïa kane ka kam da kaba kam ruh ba la bud ryntih ïa ka jingpeit bniah ia ka jingshngain jong baroh ki lain ïaid bording.
Shwa kane, halor ka jingkylli ba la wanrah da u MLA ka Dadenggre u Rupa Marak, na ka liang u myntri u la pyntip ba la don saw tylli ki jingshah lympat bording hapoh ka Dadenggre Block ha kine ki shiphew snem ba la dep.
U Myntri u la pyntip ruh ba lai tyli ki longiing jong ki lai ngut ki lanot ba shah lympat bording ki la ïoh pdiang ïa ka bai luksan kaba long lai lak tyngka.
Na ka liang u MLA u la wanrah ruh ha Iing Dorbar ba ka don ka jingjia shah lympat bording ha ka constituency jong u hynrei ka shim por haduh 8 snem ban ïoh ïa ka bai luksan kaba 1lak tyngka ïa kaba la siwe ha u Lber mynta u snem.
Halor kane, u Myntri u la jubab, “Hooid, kane kadei ka jingshisha bad ngi la tohkit halor kane ka kam balei ka shimpor bad nga kular ba kan ym jia shuh kumne nangne shakhmat.”