Nongpoh, Naiwieng 16: Tang hadien katto katne por ba u Dr. Celestine Lyngdoh, MLA ka Congress uba la wan ban pynïasoh sha ka party NPP ha kine ki khyndait bnai, ka NPP Umsning Block ha ka 15 tarik u Naiwieng 2024 ka la pynlong da ka prokram ba kyrpang ban pdiang burom sha ka party kum ka dak ban pynskhem ba u la long u dkhot ba pura ka party NPP.
Ïa kane ka jingpdiang burom la pynlong ha Sohkyndur ha kaba la wan ban shim bynta naduh u Deputy Chief Minister u Bah Prestone Tynsong, u State working President ka NPP u Bah Hamlet Dohlieng, u Spokeperson ka NPP u Bah Himalaya Shangpliang, u Bah Jason S. Mawlong president ka NPP Umsning Block, ka Kong Macdalyne S. Mawlong MDC ka Umsning, u NPYF President ka NPP Umsnning u Bah Angelstar Khonghat bad kynthup kiwie kiwei ki nongïalam bad ki nongkyrshan ka NPP Umsning Block.
Haba ai jingkren ha kane ka sngi, u Deputy Chief Minister u Bah Prestone Tynsong u la pynpaw ïa ka jingkmen ba u Dr. Celestine Lyngdoh u la wan ban pynïasoh sha ka NPP bad kane ka jingïakhun ban khring ïa u Dr. Celestine Lyngdoh ka dei kaba la jrong bha bad kaba kham sngewkmen ka long ba ha kaba khatduh u la wan ban pynïasoh sha ka NPP na ka bynta ban pynkhlain ïa ka party ba kan dang lah ban shakri ïa ka bha ka miat jong ki paidbah ha Ri Bhoi bad ha ka jylla hi baroh kawei.
U la ong ruh ba ka party NPP ka snegwkmen ruh ba u Dr. Celestine Lyngdoh u la wan ban pynïasoh sha ka NPP khlem kano kano ka jingteh kyndon bad ka jingthmu hi ka long ban trei na ka bynta ka bha ka miat bad ka roi ka par jong ki paidbah ha ka jylla hi baro kawei.
Namarkata, u la kyntu ruh ba kane ka jingwan pynïasoh u Dr. Celestine Lyngdoh ka dang pynkhlain ïa ka party NPP ha Ri Bhoi bad ha ka jylla bad u kyrmen skhem ruh ba da ka jingïatrei lang ka party kan dang lah ban ai ka jingshakri kaba bha tam sha ki paidbah.
Na ka liang u Dr. Celestine Lyngdoh ruh u la pynpaw ïa ka jingkmne ba la pdiang burom ïa u sha ka party NPP ha Umsning Block bad u la pynpaw ruh ba u pynïasoh sha ka NPP ruh ka dei na ka bynta ka roi ka par bad ban wan rah shibun ki jingkylla hapoh ka Umsning Constituency kum u MLA ba la pynkupbor da ki paidbah.
Shuh shuh, u la pynpaw ruh ba u don ka jingkyrmen ba ha ka jingïalam bastad u Myntri rangbah ka jylla u Conrad K. Sangma bad u Bah Prestone Tynsong kum u symbut mytri ryngkat ka jingïatrei lang ki nongïalam ka party, ka party NPP kan dang lah ban khlain bad ka thong hi ka long ban wan rah ïa kata ka jingkylla kaba ki paidbah ki donkam ïa ka roi ka par bad ka jingkylla ha ka long briew ka man briew, u la bynrap.
