Shillong, Nailur, 03: Ka United Hynñiewtrep Movement (UHM) Central Executive Council ha ka 31 tarik u bnai baladep, ka la pdiang burom ïa ki arngut ki dkhot kiba pynïasoh bad ka seng, kata, u nongïalam barim jong ka MIPF u samla Donbok AV Khongsit bad u samla Freddy Kurbah uba dei u nongïalam jong ka seng kiba dei peit ïa ki nong bylla sngi kata ka KJLU.
Kine ki arngut ki la pynpaw ba ka jingpynïasoh jong ki bad ka UHM ka long halor kiba bun ki nongrim.
Ha u kyrwoh ba la phah da u President ka UHM u Bah Charlie J. Rani u la ong, “kum ka seng hi baroh kawei khlem da thew ïano ïano ruh ka pdiang sngewbha ban wan rung sha ka UHM khnang ba ngin dang lah ban shakri kham bha shuh shuh ïa ka jaitbynriew jong ngi.”
Ïa kine ki arngut la pynskhem da u Vice President ka Seng u samla Kenneth Jana bad ki jingkren na u General Secretary Bah Teibor Shadap, Joint Secretary samla Shepherd Kharsahnoh bad na u Socio and Cultural Secretary Bah Wellborn Mawkhlieng bad u Organising Secretary Bah Kharlesbon Nongbri.
Ha kane ka sngi ka seng ruh ka lah shim ïa ka rai ban leit ïakynduh ïa u Symbud myntri Rangbah ka Sorkar Jylla ban ïakren halor kiba bun ki mat ki jura ba ka seng hi ka lah kwah ban ïakren bad kane ka Sorkar MDA-2 bad ha kajuh ka por ka seng ka ban pynrem jur ïa kito ki kynthei ba mihkhmat namar u mynder shi sngi hadien ka jingleit khynra jong ka KHADC ïa ki dukan ba shong die be-aiñ ha shilynter jong ka GS Road kata naduh Motphran ter ter haduh Umsohsun bad ka seng ka la maham ruh ïa kito ki kynthei kiba mih khmat ba kim dei ban mih bad ïada ïa u khar poiei tang na ka bynta ka malade ka jong ki.
Ka seng kan sa leit ïakynduh ruh ïa u Syiem jong ka Hima Mylliem u Pa’iem Ainam Manik Syiem bad ïa u Chief Executive Member jong ka Khasi Hills Autonomous District Council u Bah Pynïaid Sing Syiem ban ïa phylliew jingmut halor kiba bun ki mat kiba ïatyngkhuh bad ka jaitbynriew.
