Pdiang ïa kiei kiei kiba bha ka teknoloji ha ka imlang sahlang: Bah Metbah

Mairang, Naitung 4: Kum shibynta ban kyntiew ïa ka kam pule puthi lyngba ka jingpyndonkam ïa ki bor teknoloji, ka ophis jong ka Block Development Officer, Mairang C&RD Block Mairang, hynne ka sngi ka la ïoh ban pynlong ïa ka prokram sam M-Tab hapoh ka skhim Chief Minister’s Digital Learning Aid Scheme sha ki khynnah Class XI jong u snem 2022-2023.
Ïa ka jingsam M.Tab la pynlong ha St. Thomas Higher Secondary School, Mairang, ha kaba u Bah Metbah Lyngdoh Chairman jong ka Meghalaya State Planning Board bad ruh u MLA ka thaiñ u la long u Kongsan, ha ka jingsynran lang jong u Deputy Commissioner ka Eastern West Khasi Hills District, u Bah G. Kharmawphlang u ba la long u symbud kongsan.
Ha kane ka prokram la sakhi ruh ïa ka jingdon ryngkat jong I BDO ka Mairang Block, I Dr L.R Hynñiewta, u Sub- Divisional School Officer Mairang, u Bah J. Thyrniang, kiwei kiwei pat ki dei ki nongtrei sorkar, ki nonghikai bad ki khynnah pule jong ki skul bapher bapher jong ka Mairang Block.
Haba kren kum u kongsan ha kane ka prokram, u Bah Metbah Lyngdoh u la ong ba ki khynnah pule ki long ka lawei jong ka imlang sahlang. Kumta ki dei ban trei minot ban ïa ryngkat bor bad ki khynnah pule na kiwei pat ki bynta jong ka pyrthei, ha ka rukom pyndonkam ïa ka jingstad teknoloji ha ka pule puthi kaba man ka sngi ka jong ki. U la kyntu ruh ïa baroh kiba ïa sakhi lang ïa kane ka prokram ba kin pdiang ïa kiei kiei kiba bha ba ka bor teknoloji ka wanrah ha ka imlang sahlang.
Shuh shuh, u Bah Metbah u la ong ruh ba ka long ka kabu kaba khraw ïa ki khynnah pule ba kin ïoh pdiang ïa kiba kum kine ki lad jingïarap kiba ka sorkar ka ai khlem kano kano ka jingsiew pisa. U Bah Metbah u la kren ruh shaphang ka jingkyrduh kam kyrduh jam kaba long kawei na ki mat kaba donkam bha ban ïatai ha ka ri bad ka jylla. U la kyntu ruh ïa baroh ba kin ym khmih lynti tang ïa ki kam sorkar hynrei ba kin thaw lad ïa kiwei pat ki rukom kamai jakpoh.
Katba, u symbud kongsan, kata u Bah G. Kharmawphlang u ba long u Deputy Commissioner ka Eastern West Khasi Hills District, u la kyntu ïa ki khynnah pule kiba la ïoh pdiang ïa ki M-Tab ha kane ka sngi ba kin pyndonkam hok ïa ki na ka bynta ban kyntiew shuh shuh ïa ka pule puthi ka jong ki.
Kiwei kiwei ki bynta jong kane ka prokram ki kynthup ïa ka jingsam khusnam na ka bynta ki nongjop ha ka jingïakob dro jingdro bad jingïakob thoh poitri, ïa kiba la pynlong kum shibynta jong ka jingrakhe ïa ka sngi pynneh mariang kaba mynta u snem.