Nongpoh, Risaw 10: Da ka mynsiem jong ka jingkmen bad ka jingkyrmen ba ki paidbah ka thaiñ khappud hapoh ka Raid Nongtung kin dang ioh ka jingshakri kaba paka la ha ka shongsuk shongsain ne ha ki kam pynroi bapher bapher, ka Synjuk ki Rangbah shnong Border Area jong ka Raid Nongtung mynta ka sngi ki la pdiang bad leh burom ïa u Additional Deputy commissioner ka Ri Bhoi, u Raja Brahma, kaba dei hadien ba u la shah jied biang kum u Border Magistrate ha Ri Bhoi District ban peit kyrpang ïa ki shnong khappud ba hap ha Block II jong ka Raid Nongtung ha Ri Bhoi District.
Na liang ka Synjuk ki Rangbah shnong Border Area jong ka Raid Nongtung ryngkat ki rangbah shnong bad ki nongïalam shnong ha ka jingïalam u Bah Blikstar Sohtun ki la shim ïa kane ka kabu ban leh burom ïa u Raja Brahma uba dei u Additional Deputy Commissioner ka Ri Bhoi, ka de hadien ba u la shah jied biang kum u Border Magistrate ba thymmai ha Ri Bhoi District ban peit kyrpang ïa ka shongsuk shongsain bad ka roi ka par jong ki shnong khappud khamtam ha katei ka Raid Nongtung ba ki paidbah ki da burom halor ki jingshakri baradbah jong jong une u border magistrate ha ki snem ba la leit noh.
Ki nongïalam ka synjuk bad ki rangbah shnong lem bad kiwei ki dkhot nongïalam shnong ki la leh burom ruh ïa u Raja Brahma ha ka ophis treikam jong u mynta ka sngi ha Nongpoh, da kaba ai burom da u syntiew kum ka dak ka jingpdiang sngewbha hadien ba u la shimti ïa katei ka kam kum uta u Border Magistrate ka Ri Bhoi.
Lyngba jong kane ka sngi, na ka liang ka synjuk ki la ioh ruh ïa ka lad ban aiti ïa ka dorkhas sha Raja Brahma kum u Border Magistrate ban kyrpad ïa u ba un dang theh ïa ki kam pynroi lyngba ka border scheme sha kitei ki shnong khappud ba hap hapoh ka Raid Nongtung ha Ri Bhoi District.
Ha kane ka sngi, na ka liang ka synjuk bad ki nongïalam shnong katei ka Raid Nongtung, ki la pynpaw ruh ïa ka mynsiem jong ka jingkmen ba ka sorkar ka la jied biang ïa u Raja Brahma kum u Border Magistrate bad ka daw ka long halor ka jingpyrto jong ki paidbsah ïa ki kam kiba u la shakri kum u border magistrate barim ka Ri Bhoi, kiba u la dep leh shibun ruh ïa ki kam kiba bha ym tang ban pynneh ïa ka shongsuk shongsaiñ ki paidbah ha khappud Meghalaya bad Assam, hynrei u la wan rah ruh shibun ki kam pynroi na ka bynta ki shnong khappud hapoh ka Raid Nongtung ha Ri Bhoi District.
Shuh shuh, na ka bynta ban wan rah ïa ka shongsuk shongsaiñ ki paidbah ha ki shnong khappud bad ruh ban dang kyntiew ïa ki kam pynroi, na ka liang kitei ki nongïalam shnong ki la pynpaw ruh ba kin dang ai ïa kata ka jingïatei lang na ka bynta ban trei khambha ban kyntiew ïa ka ioh ka kot, ka roi ka par bad ka shongsuk shongsaiñ ki paidbah ha kitei ki shnong khappud ka Raid Nongtung.
