Shillong, Nailar 26: Ka NERIM Group of Institutions ka la pdiang sngewbha ïa ka kynhun ki samla pule ba dang wanrung thymmai ha ka prokram kaba shi sngi kaba la khot ka ‘WELCOME MEET – 2025’ bad ïa kane ka prokram la pynlong ha ka 25 tarik mynta u bnai.
Ïa kane ka jingïakynduh la plie da ki kyntien pdiang sngewbha na ka Director, NERIM Group of Institutions,
Prof. (Dr) Sangeeta Tripathi, ha kaba ha ka jingkren jong ka, ka la wengnoh ïa ka jingsngew sheptieng jong ki kmie ki kpa ki samla pule ba dang rung thymmai kaba ki mad ha ka por ba ki phah ïa la ki khun sha ka jaka pule kaba thymmai, khamtam ha ka college.
Ka khubor jong ka na ka bynta ki kmie ki kpa ka long, “Ngin pynkylla ïa ki khun jong phi sha ki dkhot ba don jingkitkhlieh na ka bynta ka imlang sahlang”. Ka la banjur halor ka jingshisha ba ka NERIM ka dei ka ïing jingpule jong ki.
Ha kane ka prokram u Chairman ka NERIM Group of Institutions, Dr. Zoii Nath Sarma la ai ki kyntien halor ka jingdonkam ka pule puthi bad ka jingdonkam ban pynleit jingmut ha ki kamra klas, bad kum ki khynnah pule kiba don jingkitkhlieh donkam ban don ka burom kaba ïahab dur bad ka jaka pule.
U la pynpaw ïa ka bynta ki samla pule kaba la sdang da ka jingsngewtynnad, ban pynïaid ïa ka kam pule da kaba pynleit jingmut bad ban pynwandur ïalade. Na ka liang Registrar, NERIM Group, Prof. Deba Prasad Misra, la pdiang sngewbha ïa ki samla pule kiba la wanrung thymmai. U la banjur halor ka jinglong kongsan jong ka jingsngew ha la ïing na ka bynta ki samla pule. Kiba bun ki Principal bad ki H.O.D, ki la pdiang sngewbha ïa ki samla pule da ki jingkren kiba don jingmut.
Ïa kane ka sngi la pynkut da ka jingsam ïa ki khusnam sha ki samla pule kiba la ïoh ki jingjop kiba la wanrah burom ïa ka NERIM ha kiba bun ki bynta. Kine kiba la shah pynkupburom ki dei kiba la ïoh Gold Medalist bad ki topper jong ka University kiba la pynlong ïa ka NERIM Group of Institutions ban sngew sarong halor kine ki jingjop.
