Nongpoh, Risaw 06: Ka seng Khasi Student Union, North Khasi Hills District mynta ka sngi da ka jingsarong ba khraw kala pdiang burom ïa u Samla Daniel Damlong naka Ground and Pound MMA Gym, Ri-Bhoi u la ioh ban khur ïaka takma ksiar haka jingïakop National MMA Championship 2022 bala pynlong da ka All India Mixed Martial Arts Association kaba la sdang naduh ka 30 Nailur haduh 2 tarik Risaw ha Hyderabad, Telangana.
Ïa u Samla Daniel Damlong ryngkat bad u Coach jong u, u Cores Marweiñ la pdiang burom da ka KSU ha Indoor Stadium Nongpoh haka jingdonlang ki nongïalam ka KSU naduh u Bah Lambok Rymbai, Vice President ka North Khasi Hills, Bah John Lyngdoh President ka Nongpoh, Circle, u Bah Iabhalang Nongrum President ka Nongpoh Town Unit bad kiwei kiwei ki dkhot.
Kum ban shu pynpaw ba kumba 5 ngut ki rangïalehkai na Ri Bhoi hapoh ka jingïalam u Cores Marweiñ kum u Coach kila leit ban shi bynta ha katei ka lympung bala don ruh palat 600 ngut ki samla na kylleng ka jylla kiba la leit ban shim bynta ha katei ka lympung, hynrei napdeng kitei kiba la leit ïa shimbynta sha katei ka lympung tang u Daniel Damlong u ba la ioh ban khur takma ksiar haka kyrdan Light Heavy Weight Division hadien ba u la lah ban pynliem ïa u Vikas Yadav na Orissa bad lyngba katei ka jingjop utei u samla un sa pynkhreh ban leit shim bynta pat sha kiwei kiwei ki jingïakhun ba kham heh ki ban sa long shabar ri.
Naka liang u Bah Cores Marweiñ kum u Coach u la pynpaw ka jingsngewkmen kaba khraw halor ka jinglah jong u Samla Daniel ban khur ïaka takma watla kiwei kiba la leit ban shim bynta lang kila pyrshang ban ïakhun tyngeh hynrei kim shym la poi shaka thong, bad ai ruh ka jingkhublei ïaki ba kin dang ïalehkai bad kilan bha naka bynta kiwei pat ki jingïakhun.
U Samla Daniel Damlong u la pynpaw ka jingkmen kaba khraw halor ka jingjop na katei ka lympung kaba dei kawei naki lympung ba heh haka ri watla u la sdang ban kilan met naduh u snem 2017 ha Ground and Pound MMA Gym bad lyngba katei ka jingjop un dang pynkhreh pat naka bynta kiwei kiwei ki jingïakhuh ba kham heh bad kiba kham jwat.
