Nongstoiñ, Risaw 31 : Ban pynshlur ïa ki samla shynrang bad kynthei ha ka ban pynmien ban kilan met khnang ban ïoh ïa ka met kaba koit kaba khiah krat bad ba khlaiñ, ka ophis jong ka District Sport Officer ha ryngkat ka jingïatreilang ki bor pynïaid District lem bad ka District Sport Promotion Society West Khasi Hills District Nongstoiñ, ki la pynlong biang ïa ka jingïakop pynïamareh ne ka “Unity for Run’ kaba 8.7 kilometers na ka bynta ki shynrang bad kynthei.
Kane ka jingïakop mareh ka la long ha ka step sngi nyngkong ha kaba ka jingpynïamareh ka la sdang na ka phyllaw jong ka ophis u Deputy Commissioner haduh Mawïaban bad la pynkut biang ha khyrdop jong ka ophis Deputy Commissioner.
Ïa kane ka jingpynïamareh la kaweh lama da ka kong P.T.D. Sangma EAC (MCS) West Khasi Hills ha ryngkat ka jingïadonlang da ki Coach, Instructor bad staff jong ka Sport Department bad la wan ban ïa shim bynta da kumba 60 ngut ki samla shynrang bad kynthei jong ka thaiñ Nongstoiñ, kaba long kum shi bynta ban rakhe ïa ka “Azadi ka Amrit Mahotsav”. La pynkut ïa kane ka jingpynïamareh da kaba la ïoh ban sam ïa ki khusnam kaba long da ka pisa sha ki nongjop shynrang bad kynthei ryngkat ki consolation prize haduh kiba poi sha ka kyrdan kaba 11.
Ïa ka Nam lahduh na ka bynta ki shynrang la ïoh ban rah da U Nikison Nongkseh, ba ar u Raplang Snaitang bad ba lai u Banjoplang Wanniang. Na ka liang jong ki kynthei ïa ka nam lahduh la ïoh ban rah da ka Pynhunlang Puweiñ, ba ar da ka Jidalin Tympuiñ bad ba lai da ka Utiful Tympuiñ.
