New Delhli, Nailur 11 : Ki jaiñ Ryndia jong ka jylla Meghalaya ki la khring ïa ki briew napoh ka ri bad nabar ri ha ka G20 Summit ha New Delhi. U Myntri Rangbah Duh, u Narendra Modi u la leit sha ka stall jong ka Meghalaya kaba la buh ha ka Craft Bazar ha ka G20 summit. U la ïakren bad ka kynhun kaba don hangto bad u la pynsngew ïa ka jingitynnad jong u ïa ka jaiñ Ryndia kaba ïahap bad ki thong Sustainable Development Goal (SDG) na ka bynta ka jingtrei na ka bynta ka mariang, ka jingpynkupbor ïa ki longkmie bad ki lad kamai kajih kiba ïaineh.
Ka tnat Textiles bad C&RD, ka Sorkar Meghalaya, lyngba ka Textiles Department brand “Ryndia “ & “Tribal Weaves” jong ka Textiles bad C&RD ha ryngkat ki tiar ba shna da ki kti ba wanrah da ka Meghalayan Age hapoh ka tnat Kam Jngoh Kai ki la mihkhmat na ka jylla ha ka G20 International Craft Bazar.
U Bah FR Kharkongor Commissioner bad Secretary Textiles bad C& RD u la ïalam nyngkong ïa ki kynhun ka Textiles bad C&RD na ka bynta ki jingïatreilang bad ki ophisar na ka tnat Textiles ki la mihkhmat ïa ka jylla ha ka G20 Exhibition.
Ha ka jaka ba pynlong ïa ka G20 Summit ha New Delhi, la pynlong ïa ka ‘Crafts Bazaar’ (Jingpyni bad jingdie) ha Bharat Mandapam, Pragati Maidan naduh ka 8 haduh ka 10 tarik u Nailur. Kane ka Crafts Bazaar ka la pyni ïa ki tiar ba shna da ki kti na kylleng ka India da kaba peit bniah ïa ka One District One Product (ODOP), ki tiar ba ïoh jingithuh GI bad ki tiar ba shna da ki nongsaiñdur riewlum bad ki longkmie.
Ki delegate, ki lad pathai khubor na ki ri bapher bapher kiba ïashim bynta ha kane ka Summit ki la ïoh lad ban leit sha kane ka Crafts Bazaar bad thied ïa ki mar. ïa kane ka jingpyni kyrpang la pynlong da ka G20 Secretariat ha ka jingïatreilang bad ka that Textiles bad ki
Sorkar Jylla/UT. Kumba 30 tylli ki Jylla bad ki UT ha ryngkat ki kynhun ka Sorkar Pdeng kum ka Khadi Village & Industries Commission, TRIFED, Saras Ajeevika ki la ïashim bynta ha ka Crafts Bazaar. Ban pyni ïa ki tiar ba itynnad bha kiba shna ha ka thaiñ shatei lammihngi, la buh ïa ka stall ‘Focus North East’ ha ka jingïatreilang bad ka North-Eastern Handicrafts & Handloom Development Corporation (NEHHDC).
