Paw ka sap ba tbit ki rang bad ki thei ïalehkai ha ka lympyng Batminton ka EKHDBA

Shillong, Naitung, 03: Ka lympung ïalehkai Badminton kaba hynñiew ba la pynlong da ka East Khasi Hills District Badminton Association (EKHDBA) kaba la sdang naduh 29 tarik Jylliew 2023 ka la poi sha kaba kut ha ka 1 tarik Naitung 2023.
Ki don baroh 120 ngut ki rang bad ki thei ïalehhkai Badminton kiba la iashim bynta ha kane ka lympung.
Ha ka kyrdan Under 13 Girls (Single) ia ka nam lahduh la ïohrah da ka Asem Chanu Shivani, ha ka Under 13 boys (Single) la iohrah da u Haegan Diengdoh. Ha ka Under 15 Girls (Single) ka Netania T Tariang ka la ïohrah ia ka nam lahduh katba ha ka Under 15 boys (single) ïa ka nam lahduh la ïoh rah da u Gavin Kharbuki. Ha ka Mens Doubles u P. Joshi bad u Subadonbor pyngrope ki la long ki nongjop. Katba ha ka Men (Single) bad Women (Single) u Mohit Joshi bad ka Elsarica Umdor ki la ïohrah ia ka jingjop.
Ha ka Under 19 Girls (single) ïa ka nam lahduh la iohrah da ka Angenora Monin bad ha ka Under 19 Boys Doubles u Pratham Majumdar bad u Raynell Kharbuki ki la long ki lahduh.
Ha ka Under 17 Girls (Single) ka Sneha Chetri ka la long ka nongjop katba ha ka Under-19 boys (Single) u Mohit Joshi u la long u lahduh. ïa kane ka lympung la pynhap pyrda da u Project Director jong ka DRDA East Khasi Hills u Bah T. Passah u ba la long kum u Kongsan.
Ka East Khasi Hills District ka don kynrhai ki sap bad ki nongiatied Badminton kiba tbit bad kiba don jingkyrmen ban kiew shaphrang bad ban ïaryngkat bad ki nongiatied badminton ha ka Ri India. Hynrei ban poi sha kata ka thong, ki nongiatied Badminton kiba donsap ki donkam ban ïoh ïa ki jinghikai kiba paka naduh ba ki dang lung. Kumta ka East Khasi Hills District Badminton Association ka angnud bad kut jingmut triang ban poi sha kata ka thong.
Ha kajuh ka por pat ki don shibun bah ki jingeh bad ki jingeh kiba hakhmat eh ki long, ka jingbymdon ki jaka ïaleh badminton ne ki Indoor sport facility kiba biang bad ka jingbymioh jingkyrshan pisa kaba pura.
Wat ha kane ka lympung kaba mynta ruh ka Association ka la shem shitom khait ban pynlong ia kane ka jingïatied badminton namar ka jingbymdon ka ja ka kaba biang. Kumba ngi iohi ba ka jaka ïaleh badminton kata ka Tirot Sing Indoor Stadium ha Lachumiere la dep pynpra na ka bynta ban tei ia ka Bhavan bad ruh ka JN Sports Complex ha Polo ruh ki dang pynpra bad tei thymmai kaba la ktah jur ïa ka jingïaleh sport ha ka Nongbah.
ñiuma, da ka jingtrei shitom bad jingkyrshan jong ka Director Sports and Youth Affairs ka Sorkar Jylla ka Kong Isawanda Laloo la lah ban pynlong ia ka lympung kaba jop.
Ka Association ka ïai pyrshang ban wad ki lad ki lynti ban ïoh ïa ka jaka ïaleh Badminton bad jaka hikai kaba paka, khnang ban lah ban pynlong ïa ki jinghikai bad ki lympung ïakop.
Na ka bynta kane ka Association ka kyntu ïa ka Sorkar Jylla ban pynioh shi lyngkhot ka khyndew ban tei ia ka Indoor Sport facility bad ka Association ka khot ruh ïa ki nongkhaïi, ki kompeni ban wan shakhmat ban ïasnoh kti bad ïatreilang bad ka Association ban kyrshan bad kyntiew ïa ki nongïatied Badminton.