Shillong, Lber 31: La bthah ïa ka Khasi Hills Autonomous District Council (KHADC) ban pynshitom pyrshah ïa ki officer kiba don ka jingkitkhlieh ban pynslem ban thep ïa ka pisa kaba T. 29.84 lak kaba dei ka khajna jong ka Council ba dei ban thep sha ka treasury.
Ka Rule 18 jong ka District Fund Rules, 1952 jong ka KHADC ka batai ba baroh ka pisa ba la ïohpdiang da Cashier halor ka account jong ka Council dei ban phah sha ka treasury bad kam dei ban don ka account kaba dei ban leit sha ka jingpynlut.
Ka jingïapher jong ka Rule ibid, kaba ïaid da ka jingpynshisha halor ki receipt book ne register bad ka Treasury remittance challan ne bank deposit receipt ka pynpaw ka pynpaw ba ka don ka jingpynslem ban thep ïa ka pisa kaba dei ka khajna kaba la lum da ki tnat bapher bapher jong ka Council ha ka snem 2019-20 kaba ïadei bad ka petition fee, court fee, ïa ka jingdie ïa ka stamp paper, vakalatnama bad kiwei kiwei, pynpaw ka kaiphod ka Comptroller and Auditor General of India (CAG) haba kut jong ka 31 tarik u Lber, 2020.
“Ka khajna jong ka Council kaba dei T. 29.84 lak kaba la lum ha ka snem 2019-20 la thep sha ka Treasury (PLA) hadien ba la pynslem bha kaba la long sha ka 32 haduh 77 sngi,” ka la ong da kaba bynrap, “Ka jingpynslem ban thep ïa ka pisa jong ka Council kam dei tang kaba long mar pyrshah ïa ka Fund Rules bad ka jingbat sah ïa ka pisa jong ka Council ka lah ban ïalam sha ka jingpyndonkam bakla ïa ka khajna jong ka Council.”
“Kam shym la don ruh ka jingtip kaba bniah ïa ki ophisar kiba donkti ban pynslem ïa kane ka jingthep ïa ka pisa, wat hadien ba la pan, hynrei kam shym la don hapoh ka Audit. Ka Council ka dei ban pynshitom ïa kiba donkti ban pynslem ban thep ïa ka pisa kaba T. 29.84 lak kaba dei ka khajna jong ka Council sha ka treasury,” ong ka kaiphod.
Ka kaiphod CAG ka la mynjur ruh ba ka Council ka dei ban don ka rukom treikam ban pynthikna ba ka jingthep ïa ka pisa ka dei ban long ha ka por kaba biang khnang ban lah khang lad ïa ka jinglah ban don ka jingpyndonkam bakla ïa ka pisa jong ka Council na ka jingbym lah ban thep ïa ka khajna ha ka por ba biang.
