Nongstoiñ, Ïaiong 03: Katkum ki khubor ba la ïoh lum na ki heh pulit jong ka West Khasi Hills District, la ong ba ha ka miet 2 tarik mynta u bnai ha ka por kumba 10 baje ei ei mynmiet, uwei u samla Khasi ba na Nongstoiñ ba la tip kyrteng u Aiborlang Mawlieh, u la shah patan sha Langpih bad shah pynshitom beaiñ ha ki Pulit ka Assam khlem daw khlem nongrim.
Ki Pulit ki ïathuh ba ha kane ka miet, ka kali jong u Aiborlang ka la shah kawang maw ha uwei u Nepali ha ka shnong Mokoibari kaba hap hapoh ka Langpih BOP, katba u samla Aiborlang u dang lum ïa u synsar ba u wan kheit na ka jaka rep jong u. Ki ïathuh ba une u Nepali hadien ba u la lynthem maw ïa ka kali u la phet krad noh na kane ka jaka.
Halor kane u Incharge ka Lumpee (Langpih) BOP u Saikia, u ba wan poi ha katei ka jaka hapdeng ka jingbuaid jawsheh, u la patan ïa u Aiborlang sha Assam BOP bad shoh dusmon ïa u da u lathi khlem kano kano ka daw haduh ba une u samla u la mynsaw.
Hynrei hadien ka jingïoh jingtip jong ki pulit Meghalaya kiba don ha Langpih BOP, mar mar ki la leit ban pynbor ban pyllait bad dei haduh ka por shiteng synñia ba ki pulit ka Assam BOP ki sa pyllait ïa u samla Aiborlang.
Ki paid Khasi ba sah ha ka thaiñ ki la ong ba une u Incharge ka Assam BOP, u ju pyni bor bha na ka por sha ka por, kaba buh pynmih ïa ka jingeh man ka por ïa ki riew paidbah kiba shong ba sah ha katei ka thaiñ.
