Khliehriat, Jymmang, 16: U Bah Reachingson Siangshai na ka shnong Wapungskur ha ka sngi Thohdieng u la pan da ka RTI na ophis u Deputy Commissioner ka East Jaiñtia Hills District ban lap ïa ki jinghshisha ha kaba ïadei bad ka rukom thungkam thungjam da ka District Selection Committee (DSC) ha ha East Jaiñtia Hills District.
U la ong ba kane ka jingpan RTI ka dei namarba u la ïoh pdiang bun ki jingujor na ki samla wad kam kiba la pynpaw ba kim don ka jingsngew hun ne ka jingshaniah ïa ka rukom thungkam ka District Selection Committee (DSC) ha East Jaiñtia Hills District.
“Kaba pynlong ïa nga ban pan da ka RTI ka dei namar ka jing ïoh ujor na ki samla kiba aplai ïa ki kam bad na ka daw ba ngam don ki sakhi ha kti bad ngam nud ban ong kumno kumno ruh kumta nga la pan da ka RTI. Ynda nga la ïohpdiang ïa ka jubab RTI ngan sa bishar la ka dei shisha ne em kumba la ujor da ki samla wad kam. Ngan ïaid shakhmat haduh ban da ïoh ïa ka jubab kumba dei ban ïoh,” la ong u Bah Siangshai.
