Pan RTI ka JTTA halor ka jingtei ïa ka Iawmusiang Complex, lap ba dang sah haka Umdum

By Mawphor Editor On Nov 5, 2022

Jowai, Naiwieng 4: Ka Jaiñtia Tribal Traders Association (JTTA) ha ka jingbuddien ka jong ka ïa ka jingpyntrei ïa ka Iawmusiang Shopping Complex la bun bnai, ka Seng kala leit ban ïa kynduh ïa u Executive Engineer P.W.D Building ban wad jingmut na u, na kaei ka daw la sangeh ban pyntrei ïa ka Iawmusiang Shopping Complex.
Ha kane ka jingïakynduh na ka liang jong u Engineer ula pynshai ba na ka liang jong ka Department ka la dep ban ai shithi sha u Contractor ba un sdang trei noh ïa ka kam ba dang sah teng jong ka Iawmusiang, hynrei u khlem jubab ïa ka shithi jong ki bad u khlem sdang shuh ban trei ïa ka kam.
Na ka liang jong ka Department da ka jingbym banse ka hap ban pynduh (cancel) noh ïa ka jingtrei na u, ka Department ka dang process ban khot Tender noh ïa ki kam ba dang sah ban pyntrei noh ïa ka Iawmusiang.
Hadien katto katne ka P.W.D Building kala khot Tender thymmai ïa ki kam kiba dang sah, imat une u Contractor ula ïohi ïa kane, u la ai noh da ka Case pyrshah ïa ka tnat (P.W.D) Building.
Kumta ka Seng ka khlem lah ban shu sngap ne peitkai ïa kane ka kam, ka kwah ban ïoh jingshai da kaba kham bniah, ka la leit ban ïa kynduh ïa une u Contractor, ba na kaei ka daw ula ai case ia ki tnat P.W.D (Building) haduh ba ka kam kala sahteng.
Ka Seng kala pyni ha u ïa ka shithi jubab jong ka Executive Engineer P.W.D Building. Naka liang jong u Contractor ula ïathuh ïa ka Seng baka Department ka khlem lah ban siew ïa ka pisa kaba dang sah ka jong u, kumno yn sdang ïa kaba thymmai.
Halor kane ka Seng kala sngew dei ban pan noh da ka Right to Information (R.T.I) na ka Jaiñtia Hills Autonomous District Council kum ka trai jong kane ka Complex bad ruh na ka tnat P.W.D (Building) kum ka nong pyntrei ïa kane ka project.
Ka Seng lyngba u President ma Iatha Najiar ka la pan noh da R.T.I na ka JHADC bad ruh na ka tnat PWD (Buildings). Hynrei halor ki jubab kiba la ïoh lyngba jong ka R.T.I ka la pynlyngngoh ïa ka Seng, kumno la khot tender thymmai ïa ka jingtrei haba tang ka pisa na ka bynta ka 2nd Installment ym pat don, kumno u MLA jong ka Jowai u ong ba lymda dei ba ai Case u Contractor, la ïoh ban sdang ïa ka jingpyntrei ïa ka Iawmusiang Shopping Complex.
Ka Seng ka pynpaw ba ka sngew ba kane ka kam ka sah mynta haka Umdum, kam poi shano shano ruh bad kumba ong ka ktien “Iadur ki Masi iap ki plang ki kynbat”.