Pan por kyrpang ka FKS na u CM ban ïathir halor u pud u sam ki Hima Khasi

Shillong, Rymphang, 20: Ka Federation of Khasi States (FKS) kaba long ka kynhun ki khlieh nongsynshar ha ka sngi u Blei ka la pan por kyrpang na u Myntri Rangbah ka Jylla u Conrad Kongkal Sangma ban ïoh ïasyllok lang bad ban ïoh jingshai na ka Sorkar Jylla halor ki nongrim ïa pynbeit ïa u pud u sam hapdeng ka Jylla Meghalaya bad Assam bad khamtam halor ka jingdonkam ban pynbeit ïa ka First Schedule jong ka Riti Synshar ka ri India.

“Ngi la sngew donkam ban ïa kynduh ïa u Myntri Rangbah ka Jylla u Conrad K. Sangma khamtam haba u la pynpaw ba u long uba kloi ban ïakren lada don ki kyndon Annexed Agreement (AA) jong ka Instrument of Accession (IoA) ki hap hapoh ka kyndon treikam jong ka Riti Synshar ka Ri India,” ong u kyrwoh ba la phah da u Nongaibuit bad Nongaiktien ka Federation of Khasi States u Bah John F. Kharshiing.

“Na ka liang jong ki khlieh nongsynshar ka Federation of Khasi States ki sngewdei ban buddien ïa kitei ki jingkren u Myntri Rangbah namarba kitei ki kyndon ki don ka jingïadei bad ki ktah ruh ïa ka jingpynbeit ïa u pud u sam hapdeng ka jylla Meghalaya bad Assam namar kumba ka long haduh kine ki sngi ki kyntien “Khasi States” ki paw tyngkreiñ, paw bakla hapoh ka First Schedule jong ka Riti Synshar ka Ri India bad donkam ban ïashai kiei kita ki ‘Khasi States’ bad hangno kut bad sdang u pud ki “Khasi States,” ong shuh shuh u kyrwoh.