Shillong, Risaw 24 : Ka tnad Public Health Engineering (PHE) jongka sorkar jylla ka la rai ban buh ka jngtyrwa sha ka sorkar jylla ba kan aiti noh nadong shadong ha kane ka tnad ban pynpoi umdih sha ki thliew ïing briew.
U Myntri kane ka tnad u Marcuise N Marak u la ong kumba long mynta ïa ka jingpynpoi umdih sha man la ki thliew ïing briew la leh da ka tnad Shillong Municipal Board hangne ha nongbah Shillong bad da ka Garo Hills Autonomous District Council (GHADC) ha Tura. U la ïathuh ka kam jongka PHE ka long tang ban pynpoi um ha ki top um bad nangta la peit da kitei ki ar tylli ki tnad treikam.
U Myntri u la ong ba ka tnad PHE ka lah ban leh ïa kane ka kam ban pynpoi um sha man la ki thliew ïing briew bad lada aiti ha ka kan tip ruh katno ka pynpoi um sha ki top bad kumno ban pynpoi um sha ki thliew ïing briew khnang ban lait na ka jingkyrduh um.
“ Hynrei mynta ïa ka jingpynpoi um sha ka ïing briew la leh da ki Municipal bad GHADC kumta ki mih bun ki jingeh bad jingkynrum kynram ha ki jingtreikam bad kane ka buh ruh ïa ki paidbah ha ka jngeh bad jur ka jingkyrduh um” ong u Marak.
U la ïathuh ruh ba shen un sa rah ïa kane ka mat ban ïakren bad u Myntri Rangbah ka jylla u Conrad K Sangma bad kumjuh ruh bad u Symbud Myntri Rangbah ba dei peit ïa ki kam pynroi sor u ma Sniawbhalang War khnang ba kin aiti noh nadong shadong ban pynpoi um sha ki ïing briew ha ka tnad PHE.
U la ïathuh ba u la dep ïakren bad ïamir jingmut bad ki Ophisar jongka tnad PHE bad shen un sa rah hakhmat kitei ki khlieh nongsynshar jongka sorkar jylla.
“ Lyngba kane ngi kwah ban shimti nadong shadong bad ngin bud dien bha ruh ïa ka jingpei ki pipe bad tuid ei ka um sha nala kaba long ka jingduh nong kaba khraw ïa ki paidbah” pynkut u Marak.
