Pan ka NHAI ban plie noh ïa ka Toll Plaza, pyrshah jur ka KSU, phah moramot shuwa ïa ka Surok

Khliehriat, Nailur 19: Ka Khasi Students Union East Jaiñtia Hills District Unit, ha ka jingïalang ba la shah khot ba la pynlong mynta ka sngi ha conference Hall ha ophis u Deputy Commissioner ha Khliehriat, ka la pynpaw ka jingpyrshah jur halor ka jingpan jingbit ka National Highway Authority of India kaba kwah ban pan jingbit ban plie noh ïa ka jaka lum khajna kaba don ha Lumshnong, ha kane ka jingïalang la ïa don lang ruh katto katne ki nongïalam shnong, ki dkhot ka KSU East Jaiñtia Hills District lem bad ka KSU Narpuh Circle bad ïa kane ka jingïalang la pyniaid da u ADC ka East Jaiñtia Hills District, u bah G.Warjri, MCS.
Ha katei ka jingïalang, na ka liang ka NHAI ym shym la don ba wan mih ban ïa don ryngkat lang, kumta ïa ka rai ba la shim ha katei ka jingialang u ADC u la ong ba un sa phah ne pyntip sha ka NHAI bad kumjuh ruh sha ki bor sorkar ba halor.
La ong ba ka seng ka la lyngngoh shi katdei eh ïa ka jingkot jingialang ki bor district ha Conference hall, ha Khliehriat “ngi dang mut ba ka sorkar ka khot ban ïa tai sani bha halor ka jing bym shimkhia ka NHAI ban maramot ïa ka surok, pynban da kumwei ha kaba ïa kren ha jingïalang la ïakren pynban ïa ka jingthmu ban plie Toll gate”
Kumba ka seng ha ryngkat lang ki paidbah jong ka thaiñ Narpuh, lem bad ki bor pyniaid shnong ka thaiñ ki la rai ha ka jingiakhi paidbah ba la pynlong myn ha ka 8 tarik u bnai nailar 2023 ba kin nym plie ïa katei ka toll gate ha Lumshnong tat haduh ba ka NHAI kan da pynbha ïa ka surok haduh kumba 70 haduh 80 percent ka jingmaramot bad dei naduh katei ka por ba ïakhin ïa katei ka jaka lum khajna ka NHAI ha Lumshnong la khang tala da ki dkhot ka seng, ki waheh shnong bad ki paidbah bad kat haduh mynta ka seng bad ki paidbah ki ieng skhem ha ka nongrim ba ki la rai tat haduh ba ka sorkar bad ka NHAI kin da maramot bha ïa ka surok kaba la jot rathai ha shilynter ka surok NH-6.
“Ia mynta hi ka jinglong ka surok ka la nang jot rathai katba nang mih ki sngi, te ha kato ka sngi ba ngi pynlong jingïakhih ngi la dep shim ïa ka rai ban khang shwa haduh ba ka NHAI kan da maramot ïa ka surok haduh 70 percent, nfi ïohi ba ka NHAI kam don jingkitkhlieh ïa ka jingsniew ka surok” pynpaw u President KSU Narpuh Circle, u bah K.S.Suchiang ha ka jingïalang.
Na ka liang u President KSU East Jaiñtia Hills Disrict Unit, u bah Streamly Suchen, u la ong bad pynpaw hakhmat u ADC ba “Hadien ba ngi la iohi ïa kane ka jingjot jingjulor ka surok, mynta te ngi hap kynthoh ïa ka sorkar, balei ka ban beiñ haduh katne katne ïa ki paidbah ka district, lah isynei ïa ki paidbah khamtam ki khynnah skul kiba iaid ha lynti, ki paidbah mynta ki la bitar bha ïa kane ka jingleh ka NHAI, ki ïa khrong ïa ka pisa katba ban pynbha ïa ka surok pat kim lah, ngi donkam ïa ka surok ba bha ka ban nym buh jingeh ïa ki nongleit nongwan bad ïa ki paidbah ka district bad ïa baroh kito kiba leit ba wan na kane ka surok NH-6”.