Pan Jubab ka DC na ki nongïalam ka FKJGP ba pynkheiñ kyndon ha ka sngi ïaid paidbah

Shillong, Risaw 30 : Ka Deputy Commissioner jongka East Khasi Hills I Kong Isawanda Laloo, IAS i la pan jubab na ki nongïalam ka FKJGP halor ka jingpynkheiñ kyndon bad jingmih ki jingkulmar bad shoh briew ha ka sngi ïaid paidbah ka seng ha ka 28 tarik Risaw 2022 halor ka jingbym ïoh kam ïoh jam.
Ha ka shithi ba la phah la pynpaw ba ki kyndon ba la buh da ki bor synshar distict ban shah ïaid paidbah kaba la pynmih ha ka 25 tarik u Risaw la pynkheiñ lut da kiba ïashim bynta ha ka jingïaid paidbah bad kane ka long pyrshah ïa kaei kaba la kular da u General Secretary ka FKJGP u bah Eldie N Lyngdoh.
“ Na kata ka daw la bthah ba dei ban pynshai balei ym lah ban pyngat kyndon pyrshah ïa phi haba phi la pynkheiñ ïaki kyndon kiba la buh da ki bor synshar district ha ka jingai bor ba phin ïaid paidbah”.
“ La bthah ïa phi ba phi dei ban pynpoi ïaka jubab bad ka jingpynshai sha ka ophis jongka DC ha lane shwa ka 1 tarik Naiwieng bad lada phim leh ïa kaba la bthah yn leh pat da ki lynti ka aiñ pyrshah ïa phi”.
Bun ki briew kiba la mynsaw jur bad malu mala ruh bad bun ki kali ba lapait ïit ha katei ka jingïaid paidbah ka FKJGP ha ka 28 tarik. ïa kane la ïohi bad lap da ki bor synshar district ba la leh da kito kiba ïashim bynta ha ka jingïaid paidbah.
Kiba bun ki seng saiñ pyrthei ki la dawa ba dei ban thung jingtohkit bad dei ruh ban leh da kaba tyngeh ïa kito kiba ïadonkti.
Haba u nongthoh khubor pat u pyrshang ban swar jingmut na kiba bun kumno ki sngew ba ki pulit ki khlem leh ei ei haba ki ïohi ba katto ki mih ki jingkulmar, kiba bun ki pynpaw ba kawei ka dei ba ki khlem ïoh hukum nalor bad kaba ar ki ong ka bha ba ki pulit ki khlem leh ei ei hynrei ban da dei ba ki pulit ki bom lathi ne siat teargas ïa kito kiba ïaïaid paidbah katta la mih ki jingkulmar baroh kawei ka nongbah Shillong bad la ïahap shong korphiw ruh bad kan pynthut kham tam ïaki khynnah skul ba la jan ka eksamin phainal. Nalor kata ki ïa pynpaw ba kaba kut hi ka jingïakhih kan kut ha Motphran sharum bad shah ktah ruh tang kine ki thaiñ hi. Kumta ki ong ka bha hi ba ki heh pulit ki khlem hukum ïa ki pulit ban leh ei ei ha katei ka sngi.
Na ka liang jongka Meghalaya Tourism Development Forum (MTDF) pat nalor ba ka pynrem ia ka jingjia ka kyntu ïa ka sorkar ba ka dei ban kem mardor ïa ki nongpynkulmar ha ka jingïaid paidbah ka FKJGP ha ka Sngi Thohdieng halor ka jingkyrduh kam kyrduh jam.
Ha ka jingpyllait khubor na u Chairman ka MTDF u bah Larsing Sawyan u la ong “ Donkam ban wanrah biang ïa ka jingshaniah ki paidbah ha ki bor synshar kiba peit iaka suk ka saiñ da kaba pynthikna ba ïa kane kito kiba thaw jingkulmar kim dei ban lait na ka kti jongka ain”.
U la ong ba ka MTDF ka kyntu ruh ïa ka FKJGP ban ïarap ïa ki bor synshar ban pynithuh ïa kito ki briew kiba thaw jingkulmar da kaba shoh bad bom ïa ki briew ba lui lui.
“ Kito ki nongthaw jingkular ki dei ki nongshun ba khraw jongka jylla bad ki paidbah namar ki la wanrah ka jinglehraiñ bad pynhiar kyrdan ïa ki paidbah ka jylla Meghalaya bad ki la pynbud nam da shisha ïa ka jylla” ong u bah Larsing.
U la ong “Ha kane ka juk jingnang jingstad jong ki bor teknoloji, ngi im ha ka juk kaba saphriang sted ki jingtip. Ki jingjia kaba la jia ha ka Sngi Thohdieng ki la saphriang lut kylleng ka jylla, kane ka thaiñ, ka ri bad wat sha kiwei ki ri ka pyrthei ruh”.
U pynpaw ka jingsngewdiaw ba lyngba kine kiei kiei ki la wanrah ka jingshah kynthoh ba har rukom ïa ka jaidbynriew hi baroh kawei.
“ Ka long kaei kaei kaba sngewsih ban ong ba ka jingïaid paidbah halor ka jingkyrduh kam kyrduh jam ka la wanrah pynpan ka jingktah ïa ka jingkiew ka ïoh ka kot bad burom jongka jylla bad kane ka la nang ktah shuh shuh ïaka jingbym ïoh kam ïoh jam namar ha ka jaka ba kiwei kin wan seng kam seng jam hynrei kim nud shuh” ong u bah Larsing.
“ Hooid u President ka FKJGP u la panmap halor ka jingjia bad ngi ai ka jingïaroh ïa u ba kum u nongïalam ula pdiang ïa kine ki jingleh bakla jong ki dkhot. Hynrei kiei kiba la jia pat ha ki riew lui lui ka long ka kam runar bad ka dei ka jingjia kaba la ktah ïa ka nam bad burom bad ka jinglong shida jong ki paid Khasi bad Jaintia. Kane ka la ktah jur ruh ïaka ioh ka kot ka jylla khamtam eh ha kaba ïadei bad ki kam jngohkai pyrthei” ong biang u Chairman ka MTDF.
U la ong hooid ban ïakhih, dawa bad pynpaw ki jingpyrshah ki long kiba dei eh ha kane ka ri synshar paidbah hynrei ha kane ka juk ba mynta ki dei ban long da kiwei ki lad ki lynti kumta la kyrmen ba ki seng bhalang kin pyrkhat bad haba ki shim ïakino kino ki issue ïaid da ka lynti kaba jai jai bad ka suk ba saiñ.
Ka bor jongka jingïakren bad ka jingïaleh kaba khlem ïa umsnam ka dei ka lynti kaba la pynïoh ïa ka jinglaitluid ka ri mynta la 75 snem. Kumta balei ba donkam ban ïaleh da ki kam ïa umsnam ha kaba kiba bun ki ri kim ïaid shuh da kine ki lynti.
Kumba long mynta ka kam jngohkai pyrthei ka dei kawei na ki lad ban kyntiew biang ïa ka ïoh ka kot jongka jylla khamtam hadien ka khlam, kumta ka long kaba donkam ban phai bad kyrshan ïa kane ka kam kaba lah ban bsa bam ïa ki nongshong shnong ka jylla khamtam ha ki thaiñ nongkyndong, ong u Chairman ka MTDF.
Ka MTDF ka kyntu ïa ki paid nongshong shnong,ki Dorbar Shnong, ki Seng Bhalang bad baroh ban ïatrei lang kawei na ka bynta ban wanrah ïa ka shongsuk shongsaiñ khlem da ñiew ïa ki jingsngew ïapher niam ne jaidbynriew.