Pan jingpynshai ka MHA ïa ka Entry & Exit Point, shen yn lum ka Sorkar ïa ki kynhun bapher

Shillong, Naiwieng, 15: Ka Sorkar Jylla shen kan sa lum da ka jingïalang ïa ki kynhun bapher bapher hadien ba ka Ministry of Home Affairs (MHA) ka Sorkar Pdeng ka la pynphai kylla ïa ka Meghalaya Residents Safety and Security Amemdment Bill 2020 da kaba phah lang ruh bad katto katne ki jingkynthoh.
Ha ka jingïakren bad ki lad pathai khubor hadien ka jingïakynduh ïa u Bah Prestone Tynsong uba long u Symbud Myntri Rangbah ka jylla uba peit ïa ka tnat Kam Pohing, u President ka Hynñiewtrep Youths Council (HYC) Bah Roy Kupar Synrem u la ong, “u Symbud Myntri Rangbah u la ong ba ka Ministry of Home Affairs, ka don ïa ka bhah kaba ïadei kumno ba ka Sorkar Jylla kan pyntreikam ïa ki kyndon ban buh ïa ki khyrdop ki ban pyrkhing ïa ki briew kiba wan na shabar ka jylla.”
“U (Bah Prestone) la pyntip ïa ngi ha kaba ïadei bad kane kakam, ka Sorkar ha ki sngi ban sa wan kan sa khot da ka jingïalang ïa ki kynhun bapher bapher, ïa ki seng saiñpyrthei, ki nongsynshar shnong ban ïakren halor ka shithi ba la ïoh na ka Ministry of Home Affairs (MHA) bad ban wad ïa ki lad ki lynti kumno ka Sorkar kan jubab ïa ka shithi lane kaei kaba ka Sorkar Jylla ka hap ban leh khnang ban pynthikna ba kane ka Meghalaya Residents Safety and Security Amemdment Bill 2020 yn lah ban pyntreikam bad ban ïoh ïa ka jingmynjur na u Lat jong ka Jylla,” la ong u Bah Synrem.
U la ïathuh ba ka Seng ka la pan ïa ka shithi ba la phah da ka MHA khnang ba ka Seng kan ïoh ban peitbniah ïa ki jinglap kiba ka Ministry ka la ai khnang ba ka seng kan dup lah ban ai jingmut sha ka Sorkar Jylla bad kaei kaba ka Sorkar Jylla kan leh na ka bynta kaba bha tam bad ba yn dup lah ban pyntreikam ïa ka Bill.
U la ïathuh ruh ba ka Seng ka la pan jingpynshai na u Symbud Myntri Rangbah halor ka Inner Line Permit (ILP) kaba dang sahkut ha ka almari jong ka Sorkar India mynta la lai snem eiei.
“Halor ka ILP, na ka liang jong ka seng hadien ba ka ïa ka Resolution kaba la mynjur ha u snem 2019, ka Sorkar ka la phah sha ka Sorkar Pdeng ban dawa ba dei ban pyntreikam ïa ka Inner Line Permit (ILP) bad ngi la kylli ruh kaei kaba la jia ïa ka ILP. Shwa ka elekshon sha ka Ingdorbar Thawaiñ ngi la kylli ruh ïa u Symbud Myntri Rangbah bad u la kular ba u Myntri Rangbah bad ka Kynhun Myntri kin sa leit ban ïakynduh ïa u Myntri ka tnat Kam Pohing u Amit Shah bad ïa u Myntri Rangbahduh ka ri u Narendra Modi,” u la ong bad bynrap, “u (Bah Prestone) la pyntip ba u Myntri Rangbah bad ka Kynhun Myntri ki la ïakynduh ïa u Narendra Modi bad ha kaba ïadei bad ka ILP haduh mynta ka Sorkar India kam pat ai ïa ka jubab kaba shai la kan pyntreikam neem.”
“Ka seng ka la banjur ïa u Symbud Myntri Rangbah ba ka kamram jong ka Sorkar Jylla bad ka Ingdorbar Thawaiñ lane ki 60 ngut ki MLA kam dei ban shu kut tang haba mynjur ïa ka Resolution hynrei ngi kwah ba ka Sorkar Jylla kan ïalam nakhmat ban pynsngewthuh ïa ka Sorkar India ba kum ka jylla kaba dei ka jylla ritpaid balei ngi donkam ïa ka ILP. U Symbud Myntri Rangbah u la ong ba jingleit tied ïa ka jingkhang jong ka Sorkar Pdeng kam pat kut bad ka Sorkar jylla kan dang ïaleh ban pynkynaw ïa ka Sorkar Pdeng halor ka ILP,” la ïathuh u Bah Synrem.
Haba kylli, u la ong, “ka MRSSA 2016 kam don ïa ki bniat kiba lah ban tehlakam ïa ka jingrung kyrthep jong ki briew kiba nabar bad kaei kaba ngi ïohi ka long ba kane ka aiñ ka shu long tang ban buh jingkheiñ ïa ki nongshong wai hynrei kam dei ka register ka ban buh jingkheiñ ïa kiba wan na shabar.”
“Namarba ha ka MRSSA 2016 ym dei tang ïa ki briew kiba nabar ki ban shah buh jingkheiñ hynrei wat ki briew jong ngi ruh kiba wan na kiwei ki shnong kiba sahwai khamtam ha nongbah Shillong kin hap ai kyrteng. Ngi shim ba kane ka aiñ kan ym pyrkhing eiei ïa ka jingrung kyrthep jong ki briew kiba wan nabar bad ngi kwah ba ka MRSS Amendment Bill 2020 kumba ngi la pynpaw ïa kata ha u Symbud Myntri Rangbah u la ong ba ka lynti ba ka Sorkar Jylla kan pynthikna ba ka Amendment Bill 2020 ka dei ban treikam.”
Shuh shuh u la pyntip ba ka jingkynthoh jong ka MHA ka long ba ka aiñ jong ka Sorkar jylla kam dei ban ïatakhuh bad ka aiñ jong ka Sorkar Pdeng.