Palat spah ngut ki bor pahara ka NIT ki sngewpyrshah jur ïa ka jingdawa pisa ka Agency 15-20 hajar marwei

Shillong, Kyllalyngkot 5 : Palat spah ngut ki bor pahara ne ki sururity guard jongka National Institute of Technology (NIT) Sohra ki la pynpaw ka jingpyrshah jur ïa ka Agency kaba dang ïoh kontrak thymmai kaba kyrteng ka North East Security Service (NESS) kaba dei na Assam namar ka dawa pisa beaiñ naduh 15,000 haduh 20,000 marwei marwei ban register bad kane ka Agency.
La ïathuh na ka bynta ki langrut kane ka agency ka dawa haduh 15,000 tyngka bad na ka bynta ki Assistant Security Officer (ASO) bad Supervisor haduh 20,000 ïa kaba ym pat ju leh mynno mynno ruh da kiwei ki agency kiba ïoh kontrak ha NIT ne kiwei kiwei ki jaka ruh.
Halor kane ka Hynniewtrep National Youth Front (HNYF) ka la leit ïa kynduh ïa ki nongpynïaid ka NESS mynta ka sngi. Na ka liang ki nongpynïaid katei ka agency pat ki la kyntait da kaba ong ba kim don jingtip ei ei ruh halor kane ka jingdawa bad ki phah ban ap ïa ka jingwan jong kiba dei peit ia kane ka agency ba kin ai ka jingpynshai halor kane.
Ka HNYF ka dawa ruh ba ka NESS ka dei ban ïoh ïa ka license na ka Khasi Hills Autonomous District Council (KHADC) bad ka pynkynmaw ruh ïa kitei kiba ïoh kontrak ba ka la don ka jingïakut bad ka NIT ba kim lah ban beh ïa ki trai ri trai shnong na ka kam ban ap pahara ha NIT.
Uwei na ki Senior Supervisor uba la shakri la 12 snem u la ïathuh ba ka NESS ka la sdang ban bujli da kiwei da kaba wanrah da ki shipai ba la shongthait kiba dei ruh na bar ka Meghalaya nalor ba ki don ki shipai kiba la shongthait hapoh ka jylla ruh.
U la ïathuh katei ka pisa ba dawa ruh ka long pyrshah ïa ki kyndon jongka kontrak namar ym don kyndon satia ba kdew ba hap ban siew ïa ka pisa.Na ka liang ki bor pynïaid ka NIT Sohra ki la pynthikna ba kat kum ka soskular ba la ïasoi bad kane ka agency la kdew shai ba ki dei ban pynneh ïa baroh ki supervisor kiba dei napoh ka jylla bad kim lah ban beh ïa iwei ruh na ki nongpahara (guard).