Khliehriat, Nailar 13 : Ka East Jaiñtia Hills District, ka dei ka district kaba la ker sawdong da ki khappud jong ka Assam bad ki khappud jong ka ri Bangladesh, ka dei kawei na ki district kaba riewspah bha ha ka jingdon ki mar poh khyndew bad ka mariang kaba itynnad, ka la ïoh ïa la ka jong ka district kaba pura naduh ka 31 tarik u naitung 2012 bad sngewsih ban ong pat ba ka dei ka district kaba ju shah iehnoh beiñ ha ka sorkar ha baroh ki liang.
Katkum ka kaiphot ba la ïoh lum da u Mawphor, la sngewthuh ba ka jingdon ki tnat treikam jong ka sorkar ruh ki dang duna bha ha kane ka district bad ki don haduh palat khatsan tylli ki tnat sorkar ki bym pat don lane ki bym pat lah ban treikam pura napoh ka district, kane ka jingbym don ki tnat sorkar ki ba treikam pura ka ju buh jingeh haduh katta katta ïa ki paidbah jong ka District.
Ki tnat sorkar ki bym pat don lane ki bym lah ban treikam pura na East Jaiñtia Hills District ki kynthup ka tnat Assistant Register Co-operative Societies, Assistant Director I.P.R, ka ophis jong u Joint Director of Schools Education & Literacy, ka ophis jong u Divisional Forest Office (Wildlife), ka ophis Divisional Forest Office (Social Forestry), ka ophis Divisional Forest Office (Territorial), ka District Librarian, ka ophis jong u Executive Engineer, (CEW) A.H.&Veterinary Office, ka ophis jong u Executive Engineer, PHE- Electrical Division, ka ophis Executive Engineer, PHE (RWS) Division, ka ophis District Sericulture Office, ka District Urban Planner/Town Planning Office, ka ophis Executive Engineer, Urban Affairs, ka ophis District Handloom Office, ka ophis Weaving Inspector Office bad kiwei kiwei.
Kum ban shu kynthoh, kiba bun na kitei ki tnat sorkar ki dei kiba la i donkam shisha ban don hapoh ka district ban lah ban treikam bha na ka bynta ban kyntiew ïa ki paidbah, kumjuh ruh ban kyntiew ïa ka district, kum ka tnat pule puthi, ka ban kyntiew shuh shuh ïa ka pule puthi ha ka thaiñ.
Kumjuh ruh ka tnat Khlaw, kumba baroh ki tip ba ka East Jaiñtia Hills District ka don bun ki khlaw kiba rben bad khamtam eh ka Narpuh Wildlife Sanctuary kaba la paw bha, kane ruh ka don ha East Jaiñtia Hills District bad ki khlaw kyntang kiba don ha ki shnong ki thaw, kumjuh ruh ki paidbah kiba trei bun ki kam kiba donkam ïa ka tnat Forest, kumta donkam ban don ka tnat khlaw (Forest) ka ban treikam pura napoh ka district, kumjuh ruh kum ka tnat PWD ka ban peit ïa ka jingbit jingbiang ki surok ki lynti ki syngkien, ka tnat PHE ka ban peit ïa ka um bam, um dih, ka tnat Handloom ka ban kyntiew ïa kito ki briew ki don ka sap ban thaiñ jaiñ bad ban shna jingshna, khamtam la lap ba ki briew ha East Jaiñtia Hills District ha ki shnong bad thaiñ bapher bapher ki dei ki briew kiba don shisha ka sap ban thaiñ jaiñ, kumta kane ka tnat Handloom ka long kaba donkam ban don ban kyntiew ïa ki sap ka ban kyntiew ïa ka ïoh ka kot jong ki nongshong shnong.
Ha kaba ïakren bad u MLA barim jong ka Khliehriat Constituency, u bah Justine Dkhar, u la pynpaw ka jingsngew khia halor ka jingbym don lut ki tnat treikam jong ka sorkar, ki ban treikam pura napoh ka district bad u la ban jur ruh ïa ki ar ngut ki nongmihkhmat kiba na East Jaiñtia Hills District, u bah Kyrmen Shylla uba dei u MLA na Khliehriat bad i kong Santa Mary Shylla, i ba dei ka MLA jong ka Sutnga-Saipung Constituency ba kin shim khia ban wanrah ïa ki tnat sorkar ki bym pat don hapoh ka district ba kin treikam pura noh napoh ka district katkum ba la mang na ka bynta ka district, u la ong ba kane ka dei ka por kaba biang eh ïa kitei ki ar ngut ki nongmihkhmat ba kin kren eiei halor kane bad ki don ruh ka hok ban kren, namar mynta ki don hapoh ka sorkar kumta ki lah ban pynsngew ïa kane ka mat bad ruh, watlada dei ba ki don ha ka liang pyrshah ruh ki don hi ka hok ban pynsngew ïa kane ka mat sha ka sorkar.
“Kine ki tnat ki bym pat don dei ban wan hapoh ka district bad nalor kitei ki khatsan tylli ki tnat sorkar, ki bym pat don, ki dang don shuh shuh ki tnat sorkar ki bym pat don hapoh ka district” ong u bah Justine Dkhar da kaba bynrap ba lada kitei ki tnad kin wan hapoh ka district, kan long ka jingmyntoi bad jingkyrkhu ruh ïa ki paidbah, kan pynsuk ruh ïa ki paidbah ha ka leit ka wan, lada ki tnat treikam jong ka sorkar ki don lut kan nym ktah ïa ka jinglut bad ka por jong ki paidbah, namar kumba long mynta hapoh East Jaiñtia Hills District kiba dang bun ki tnat sorkar ki bym pat don ha kaba ki paidbah ki hap ban leit shaduh Jowai bad shaduh Shillong ruh.
“Lada shah ki kam bad wat la dei tang ki kam ba rit ba ria ruh ki hap ban pynlut sngi bad pynlut bai leit bai wan, teng teng lei don ki por ba ym lah ban ïakynduh ïa ki heh sorkar ha Jowai lane ha Shillong kiba dei ban leh ïa ki kam bad don ruh ki kam kiba ym lah ban pyndep hapoh shi sngi kane ka ktah shisha ïa ki, kane ka nang pyn jynjar shuh shuh ha kaba ki hap ban leit ar sien lai sien ban pyndep ïa ki kam, te lada don ki tnat treikam ba pura hapoh ka district kan ïarap shibun bad kan nym ktah than ïa ka por bad kumjuh ruh ka jinglut jingsep bad ha kajuh ka por lada don lut ki tnat treikam jong ka sorkar kan wanrah ruh ïa ka lad ïohkam ïohjam jong ki briew jong ka district,” la ong u MLA barim.
Haba kren shaphang ka ophis PHE, u la ïathuh ba ka ophis ka la don ha Khliehriat, kaba dei jong ka tnat Electrical bad ka tnat Distribution, hynrei u la ong ba ka long pat kaba donkam ban don da ka ophis jong u Executive Engineer (PHE) khnang ban dup lah ban treikam pura, namar ki SDO kim pat lah ban treikam pura.
Ha kaba ïadei bad ka tnat Khlaw (Forest) u bah Justine u la ong ba “Ka tnat Forest lei, watla ka ophis ka la don ruh, hynrei long kumba kam don, namar ki nongtrei kim pat lah ban leh eiei ruh napoh ka district, dang hap ban pyndep ïa ki kam ki jam baroh na Jowai, ki nongtrei kiba don ha Khliehriat ki shu long tang kum kito ki nongpeit, nongkhmih”
Ha kaba ïadei bad ka tnat pule puthi (Education), u Bah Justine, u la pynpaw ka jingsngewkhia kaba jur bad ong, “Ha ka jingshisha ka ophis jong u DSEO bad SDSEO ki la don hapoh ka district, ha Khliehriat tangba kim pat lah pat ban treikam pura napoh ka district bad ka donkam bha ba kane ka tnat ruh kan treikam pura noh napoh ka district, tangba hapoh East Jaiñtia Hills Distrit la donkam ban ruh ka ophis jong u Joint Director bad ka ophis u Additional Director ha ka tnat Education bad dei ruh ban don ka MBOSE Cell, namar lada ngi don kino kino ki kam kiba dei na ka bynta ki khynnah pule, ngi hap ban leit shaduh Jowai, don ki por ba ym lah ban ïakynduh ïa ki ba heh kane ka buh jingeh”
Utei u MLA ba rim, u la ong bad pynpaw ba ka jingbym don ki tnat sorkar ki ban treikam pura napoh ka district bunsien ka buh jingeh bha ïa ki paidbah ka district bad u la kyntu ruh ym tang ïa kitei ki ar ngut ki nongmihkhmat kiba na East Jaiñtia Hills District, hynrei u kyntu ruh ïa ki paidbah, khamtam ki Synjuk ki Waheh Shnong, ki kynhun Sengbhalang, ki khynhun jong kiba trei mon sngewbha ba kin mih shakhmat ban kren eiei halor kane ka jingbym pat biang lut ki tnat treikam jong ka sorkar hapoh ka district, namar lada biang bad lada ki tnat sorkar ki lah ban treikam pura napoh ka district kan long ka jingmyntoi bad jingkyrkhu ïa ki paidbah bad hakjuh ka por kan wanrah ïa ka roi ka kiew bad kan wanrah ïa ki lad ïohkam ïohjam jong ki paidbah jong ka district.
