Palat 992 gram u dawai kuli Amphetamine kurup ki Pulit Umkiang na ki thei Manipuri

Khliehriat, K’lyngkot, 11: Ki Pulit ka Umkiang Patrolling Post, East Jaiñtia Hills District katba ki dang pynlong ïa ka jingtalasi kali ha Ratacherra Anti Infiltration Check Post, East Jaiñtia Hills District ha ka sngi Saitjaiñ ki la ïoh kurup ïa ki dawai kuli Amphetamine na ki ar ngut ki kynthei Manipuri kiba shong ha kawei ka kali kamai Force Traveller kaba dang wan na ka thaiñ Assam.
Ki Pulit ki la ïathuh ba katba ki dang peit bad bishar bniah ïa ki kot ki sla jong kiba shong kali, ki la ïohi ïa kawei ka kynthei ba la tip kyrteng kum ka Esther Vunghoihching kaba shong ha ka Seat Number 15 kaba ki la ishan khmat bha. Ha ka jingkhynra ïa ka jaka ba ka shong, ki Pulit ki la lap ïa kawei ka pla plastik rong ïong ba la buhrieh bha hadien ka Seat bad na ka plastik ki Pulit ki la lap ba ki don lai tylli ki song barit ba la sop bha da ki Brown Paper bad na kine ki jingsong la lap shuh shuh ba ki don ar phewsan tylli ki pla kiba barit bad hapoh ki pla barit la thep haduh 200 tylli ki dawai kuli ha kawei-kawei ka pla rit.
Hadien ba ki Pulit ki la tohkit, ka Esther Vunghoihching ka la phla ba ka la wan lang bad ka Nahnah jong ka, ka Nianenciin kaba shong ha ka Seat Number-1 bad ha ka jingtalasi ki Pulit ki la ïoh kurup ruh ïa ki dawai kuli.
Ïa kine ki arngut ki Pulit ki la rah noh sha ophis jong ka Ratacherra Check Post ban pynlong ïa ka jingtohkit kaba bniah.
Ynda la khynra ïa ka met jong ka Nianenciin da ki kynthei briew ba la bthah hapoh ka Check-post, la lap shuh shuh sa ar phewsan tylli ki pla ba rit kiba la thep 200 tylli ki dawai kuli ba la thep ha kawei-kawei ka pla barit bad ïa ki pla rit ka Nianenciin ka la buhrieh ha ka jaiñ saiwul (woollen muffler).
Ka Esther Vunghoihching, 37 snem ka rta ka dei kaba sah ha ka shnong Lapalang, Mawbynna, East Khasi Hills bad ka Nianenciin, 45 snem ka rta ka dei na ka shnong Bethel Veng, New Lamka, Churachanpur Sub Division, Manipur.
Hadien ba la leh tes, ïa ki dawai kuli ki la lap ba dei ki dawai Amphetamine.
Na ka Esther Vunghoihching ki Pulit ki la la ïoh kurup 495.66 grams ki kuli dawai, kiba kynthup haduh 5,000 tylli ki dawai kuli bad na ka met jong ka Nianenciin pat la ïoh kurup 496.41 gram ba kynthup haduh 5000 tylli ki dawai kuli.
Ki Pulit ki la kem noh ïa kine ki ar ngut bad ïa ka ejahar la rejistar ha Lumshnong Police Station hapoh ki kyndon aiñ jong ka NDPS Act.
Ka jingtohkit ïa kine ki arngut ka dang ïaid shakhmat ban lap ksai shuh shuh ïa kiwei pat kiba donkti.