Shillong, Risaw 20 : Ki la don haduh palat 700 ngut ki samla na ki 12 tylli ki distrik jong ka jylla kiba la poi sha ka Meghalaya Youth Exchange Programme 2023 ba la pynlong da ka Directorate of Sports & Youth Affairs ka sorkar jylla naduh ka 16tarik bad pynhap pyrda noh pat ha kane ka sngi Thohdieng.
Ha katei ka sngi kut kaba la pynlong ha Convocation Hall, NEHU Campus Mawkynroh Shillong la wan ban donlang ruh naduh u Myntri ka tnad Sports Bah Shakliar Warjri kum u Kongsan ryngkat ka Kong I Laloo, Director ka tnad Sports & Youth Affairs.
Haba kren ha ka jingïalang, u Myntri u la pynpaw ïa ka jingkmen kaba khraw halor ki sap bapher bapher ba ki samla ki pyni bad sei pyrthei ha kitei ki sngi lyngba katei ka prokram.
Shuh shuh u kyntu ruh ïa ki samla ba ki dei ban shim kabu ïa kum kitei ki rynsan ba la plie kyrpang na bynta jong ki khnang ba kin lah ban pynjanai shuh shuh ïa ka sap ba ki don bad ruh ban tip shuh shuh ïaka kolshor jong ki para nongshong shnong kiba don ha kylleng ki bynta jong ka jylla.
U Myntri u la pynbna ruh ïa bun ki lad ki lynti kiba ka sorkar ka la dep ban maitphang na ka bynta ban kyntiew bad plie lad plie lynti ïa ki samla don sap jong ka jylla bad ruh ban kyntiew ïa ka rukom im jong ki.
Ha kitei ki sngi, ki la don shibun bha ki prokram kum ki rynsan ïakob rwai bad shad tynrai, ïakob tem bad put, ïakob tyrko, bad ruh ka jingïaleh kai skit halor ka phang ‘Mission Life’, nangta ka jingïalehkai ‘talent hunt’ bad kiwei kiwei.
Na ka liang u Kongsan u la sam ruh ïa ki khusnam ba pher bapher sha ki nongjop ha kitei ki lympung ïalehkai.
