Palat 26 ngut ki MDC ki khlem pynpaw ïa ka rukom pyntreikam ïa ka ST&RWP, ong ka CAG

Shillong, K’ Lyngkot 07: Palat 26 ngut ki dkhot jong ka district council (MDC) la kynnoh ba ki la pulom ban pynpaw ïa ki jnit ki jnat ne ki jingtip ba bniah halor ka jingpyntreikam ïa ki skhim ka Council halor ka Special Town and Rural Welfare Programme.
Ïa kane la pynpaw da Comptroller and Auditor General of India (CAG) ha ka kaiphod jong ka 31 tarik u bnai Lber, 2019.
Ka Khasi Hills Autonomous District Council (KHADC) ka la pyntreikam ïa ka skhim ka Council halor ka Special Town and Rural Welfare Programme da ka jingthmu ban pynbiang ki jingïarap ïa ki longïing kiba duk kiba kyrduh kiba mad bun ki jingeh, khnang ban pynlah ïa ki ba kin lah ban pynïaid bad kine ki jinglong jingman bad ha kajuh ka por ban pynshlur ïa ki ba kin shim ïa ki sienjam kiba don jingmut bad ba kin seng ïa ki kam lajong kiba neh.
Ka jingbthah halor kane ka skhim ka long ba ïa kane ka skhim dei ban pyntreikam lyngba ki MDC ha ka jaka kaba heh bad ïa ka pisa yn sa pyllait sha ki MDC bad kan dei ka jingkitkhlieh jong ki MDC ban pynthikna ba ïa ka pisa la pyndonkam ha ka rukom kaba dei bad ha ka shit kaba shai bad kan dei ruh ka kamram jong ki MDC ban aiti ïa ki Utilization Certificate (UC) hapoh ki 6 bnai naduh ka tarik ba la pyllait ïa ka pisa bad ha ryngkat ka jingkyrshan jong ki voucher.
Ha ka snem 2018-19, ka KHADC, hadien ba la mynjur da ka Executive Committee, ka la mang T. 182.00 lak, T. 24.00 lak ha ka 12 tarik u Ïaïong, 2018 bad T. 158.00 lak ha ka 15 tarik u Kyllalyngkot, 2019 kum ka Grand-in-aid hapoh ka Special Town and Rural Welfare Programme sha ki dkhot ha ka dor T. 4 lak sha ki 7 ngut ki MDC, T. 6 lak sha ki 7 ngut ki MDC bad T. 8 lak sha 14 ngut ki MDC da ka jingbthah ba ïa ki UC ba donkam dei ban aiti hapoh ki 6 bnai naduh ka tarik ba la pyllait ïa ka fund.
Ka jingkhmih la pynpaw ba Secretary, Executive Committee, KHADC la siew ka pisa kumba T. 182 lak, T. 24 lak ha ka 13 tarik u Ïaïong, 2018 bad T. 158 lak ha ka 21 tarik u Kyllalyngkot, 2019 kum ki grant hapoh ka programme.
“Pyrshah ïa kine ki grant, tang arngut ki MDC ki la aiti ïa ki jingkyrshan lyngba ki voucher bad ki UC na ka bynta ka pisa T. 14 lak, T. 8 lak ba la ai da MDC sha ki women SHG ha ka dur jong ki tiar kum ki tiar ïing, tarpualin bad kiwei kiwei bad T. 6 lak ba la siew da u MDC sha ki 128 ngut ki riew shimet kaba long ha ka dor T. 1000 haduh T. 33000 na ka bynta ban maramot ïa ki ïing, ban thied ïa ki CGI sheet, ki kot pule, PA system, ki dawai, ki tiar ïalehkai, school uniform, shuki plastic bad kiwei kiwei,” ong ka kaiphod CAG.
“Shuh shuh kam shym la don ka record ba ki 26 ngut ki MDC ba dang sah ba kin ai ïa ki jingtip ba bniah halor ki longïing BPL, SHG, NGO bad ki riewshimet halor ki kam ban kyntiew ïa ki briew ha ki nongkyndong, ban ai ki jinghikai ban sengkam lajong, ka jingpynkupbor ïa ki longkmie, ban pynkupbor ïa ki briew kiba duna ha ki dkhot met ha kaba ka jingïarap kaba la ai da ki MDC,” ong ka kaiphod da kaba pynpaw shuh shuh ba ki UC ha ryngkat ka jingkyrshan ki voucher khlem shem ba kin don kiba aiti.
Haba pdiang ïa kine ki jingkhmih, ka ophis Secretary ka Executive Committee, ka KHADC la ong ba ha u Nailar 2022 ba wat hapdeng ki jingpynkynmaw, kitei ki MDC kim shym la aiti satia ïa ki utilisation certificate ba donkam.