Shillong, Lber 27 : Ka KHADC ka la ïoh ban lum palat 26 lak tyngka kum ka khajna na ki 16 tylli ki khyrdop lum khajna (toll gate)kiba don hapoh u pud u sam jong ka ha kane ka samoi 2024-2025.
Ïa kane la pyntip da u Executive Member ka tnad Bah Winston Tony Lyngdoh haba jubab ha Ïing Dorbar ha kane ka sngi Palei.
Na kine ki 16 tylli ki khyrdop lum khajna, la pyntip ruh ba ka laisen jong ki 7 tylli ki khyrdop kin kut noh ka por treikam jong ki ha ka 31tarik Lber 2025, katba ki 9 tylli pat ki la aplai ban pynthymmai biang.
“Hynrei, ka Executive Committee kan bishar bniah shwa ïa ki aplikeshon jong ki ha shwa ban shim rai halor kane,” ong u EM.
Katkum ka jingong jong u, kine ki khyrdop ki la ju lum kumba 500 tyngka na bynta ki kali heh, 300 tyngka ïa ki kali ba pdeng bad 100 tyngka ïa ki kali rit.
Haba jubab pat halor kawei ka jingkylli, u EM u la pyntip ba ki don saw tylli ki checkgate ha kaba ar tylli ki don ha Ri Bhoi District bad ar tylli pat ki don ha East Khasi Hills.
La ïathuh ba ïa ki check gate ha Umïam la pynïaid da u Bah W Ryntathiang bad ha Lum Nongrim Umling da u Bah S Surong katba ka check gate ha Mawryngkneng – Mawkhanu la pynïaid da u Bah S Kharsati bad ha Majai da S Thangkhiew.
U la pyntip ruh ba ka EC kam don jingtip ei ei halor ki khyrdop lum khajna beain kiba treikam ha ki thain Rambrai – Jyrngam. Hynrei u EM u la kular pat ba un sa pan ïa ka kaiphod halor kane ka bynta.
