Palat 2,000 klur mang ka sorkar Meghalaya ban pynwandur ïa ka sor ha New Shillong
Haduh 20 km ka lynti ïaid kjat bad ban ñiah cycle
Shillong, Lber 09 : Ka Sorkar jylla ka la pynkhreh shaid shaid ban pyntreikam ïa ka projek kaban kot sha ka 2000 klur tyngka ha Umsawli na ka bynta ban pynwandur ïa ka sor ha New Shillong kaba dei ka jingïaid lynti kaba khraw bha ïa kane ka sorkar mynta u snem.
Ha kane ka projek ki kynthup naduh ka Meghalaya Secretariat kaba thymmai, nangta ka Unity Mall, ka jingshna ïaki surok, ka Meghalaya Skills and Innovation Hub, ka Prime Hub, ka Heliport bad ruh ka Working Women’s Hostel.
“Ka jingtei ïa ka Secretariat ba thymmai kadei ka projek kaban sahnam namar kadei ka projek kaba ka jylla ka la thrang bad angnud bad kan long ruh kum ka jak pdeng ban ai ka jingshakri kaba kham paka shuh shuh ïa ki paidbah”, ong u Myntri Rangbah ka jylla u Conrad K Sangma ha ka jingwanrah ïa ka mangtyngka.
Nangta u ong ruh ba ïa ka Knowledge City la pynkhreh mynta ha Mawkhanu ryngkat ka jingtei ïa ki jaka jngohkai, ki jaka ïalehkai, ka IT bad ruh ki jaka. U ong ruh ba ka jingpynieng ïa ki jingtei sahnam kaban pyni ïa ka jingriewspah ka kolshor jong ka Meghalaya yn sa rah ha ka snem mangtyngka kaban wan.
Da kaba pynpaw ba ïa ka New Shillong yn pynwandur ha kata ka rukom kum ka sor ban duna lane ban ym don ki kali (non motorized city), u Myntri Rangbah u la ong ruh ba kane ka sienjam ka long ban pyntikna ba kan don ka ïaid ka ieng kaba khlem thut ha ka sor. U ong ruh ba kin don ki surok shnong bad ruh ki lynti ïaid kjat kiba ïar ryngkat ki jaka ñiah cycle kiban kot sha ka 20 kilometer ei ei.
“Kane ka pynlong ïa ka sor New Shillong kum kawei na ki sor kiba la pynwandur bad bad janai,” u la ong.
Shuh shuh u la ong ruh bana ka bynta ban pynbiang ïa ka leit ka wan hapdeng ka nongbah Shillong bad New Shillong, kin don ruh haduh lai tylli ki projek surok kiba jrong 16 km kiba ka jingtrei ka dang ïaid mynta shakhmat.
U ong ruh ba ki surok thymmai kiban shna biang ha ka snem mangtyngka kaban wan ki kynthup ïa ka surok na Polo sha Bellefonte, Mawpat sha Nongkohlew, Lumdiengsai sha Shillong Bypass. U ong ruh ba nalor kine kin don pat lai tylli ki bypass ha ki bynta ba shathie kata na Mawlyngad sha Mawkasiang lyngba ka Mawshbuit bad Mawlynrei.