Palat 200 ki MP ha Lok Sabha kin dei na ki Regional Party ha ki snem ban wan: Dr Mukul

Shillong, Nailar 23 : U Nongïalam ka TMC uba long ruh u Myntri Rangbah ba rim ka jylla Meghalaya u Dr Mukul Sangma u la ong ba ka saiñ pyrthei ka la kylla ha ka ri India bad ha ki snem ban sa wan palat 200 ngut ki MP ha ïing dorbar thawain Lok Sabha kin dei ki MP jong ki Regional Party bad ka por leh hymmen jong ki National Party ka la kut mynta.
“ Ka BJP ka kob ban jop palat 400 bad kaba duna eh ruh 300 ngut ki MP hynrei ïa kane la pynpulom bad khanglad da ki Regional Party ha baroh kawei ka ri. Kane ka la jia wat ïa ka Congress ruh. Namar ha ki jylla ki Regional Party ki la ïeng ban ïada ïa ki hok ki pot jong ki briew na kata ka daw wat ka Congress ruh kam lah ban tam ïa ka 99 seat. Kumta katba nang ïaid ki por ka jingkylla jongka saiñ pyrthei ha ki por ban wan ruh kan dang kylla bad khlem pep kin jop palat 200 ngut ki MP jong ki Regional Party ha Lok Sabha kaba don 543 ngut ki MP. Kumta kiba sah mynta kin long tang 300-350 ki seat na ka bynta ka BJP bad Congress” ong u Dr Mukul.
“ Kane ka dei ka dak ba bha na ka bynta ka ri namar kata ka synshar paidbah ha kane ka ri kan treikam bha. Balei namar ki National Party ynda ki la ïoh synshar bun snem bad da ki la sngewkhlaiñ ki sdang sa ka leh donbor ne synshar donbor bad mynta lada khlaiñ ki Regional Party kin ym ioh lad shuh. Mynta ki la sdang ban sngewthuh ruh ba kata ka jingleh hymmen kam don shuh bad kane ka dei ka dak ba bha na ka bynta ka ri bad ka jaidbynriew namar mynta ki jylla ki dei ban ïeng skhem ban pynthikna ba ïa ka sur jong u paidbah yn pynsawa lyngba ki party kiba napoh ki jylla bad ïa kane ka sur ruh yn sa ïoh sngew noh namar kita ki shkor kiba kyllut kin ym don shuh ha ka bor ha kata ka por. Kata ka jingsynshar donbor jong ki National Party ruh kan sa duh noh suki pa suki bad kane ka dei kaei kaei ka ban jia ha baroh kawei ka ri.