Palat 1.92 lak metric ton u dewïong ba la tih beaiñ lap ka jingjurip da ki Drone na suiñ ha ki jaka ba kynrei u dewiong

Shillong, Lber 25: Palat 1.92 lak metric ton u dewïong ba tih beaiñ na ki 4 tylli ki District ka Jylla katkum ka aerial survey ba la ring dur na suiñ ba la leh da ki drone bad ka kompani jurip-Garuda.
Ïa kane la pynpaw da u Justice (retd) BP Katakey uba khlieh ïa ka Committee ba la thung da ka Ïingkashari Meghalaya High Court, hadien ba pynïaid ïa ka jingïalang ha ka sngi Ba-ar.
Haba kren sha ki lad pathai khubor, u Katakey ula ong, “Ka Garuda ka la aiti ïa ka kaiphod jong ka aerial survey bad katkum ka kaiphod, ha ki saw district – East Jaiñtia Hills, South West Khasi Hills, West Khasi Hills bad South Garo Hills, la shem ba palat 1.92 lak metric ton u dewïong u dei u bym pat shim jingkheiñ”.
“Nga la bthah ïa ki ban ai ïa ki katto katne ki jingpynshai ïa kaba nga khmih lynti ban ïoh mynta lane lashai ka sngi. Kumta, katkum ka jingshem jong ki, lait na u dewïong bym pat shim jingkheiñ, ki don bun bah u dewïong hapoh ka 1 km radius. Kumta ha ka jingïalang hynne ka sngi, nga la kyntu ïa ki Deputy Commissioner bad ki Superintendent of Police jong kine ki District bad ki Tnad ba dei khmih ba kin peitngor bha halor ka jingïoh ïa u dewïong lait na une u 1.92 lak metric ton,” ula ong.
U Katakey ula bynrap, “Haba pynshong nongrim na ka kaiphod survey, ngan sa aiti ïa ka kaiphod sha ka Ïingkashari Meghalaya High Court bad ngan sa pynpaw ïa kaei ka jingsngew jong nga halor kane ka kaiphod ïa kaba ngam lah ban ïasam jingtip bad phi mynta tad hadien ba nga la aiti ïa ka kaiphod bad ba ka Ïingkashari ka la pyllait paidbah”.
Haba kylli, u Katakey ula ong, “Kino kino ki dewïong ba la shem lait na ki depot jong ka CIL ki dei lut kiba beaiñ. Hadien ba khang da ka NGT, ïa kaba la pynskhem da ka Ïingkashari Supreme Court, kaba ong ba ym dei shuh ban don ka jingtih dewïong thliew khnai satang lada la shah ïa ka jingtih dewïong hapoh ka kyndon ka MMDR Act.
Nalor kane, ula pyntip, “La ïathuh ha nga mynta ka sngi ba ka Sorkar ka la ai ïa ka prospective licence bad sa saw ngut ki la dep ïoh kaba long phra ngut baroh lang bad na kine ki phra ngut, lai ngut kila ïoh ïa ka environmental clearance katba san ngut ki dang ban ïoh ïa ka environmental clearance. Kine ki lai ngut kiba la ïoh ïa ka environmental clearance ki la sdang ïa ka jingtih dewïong”.