Shillong, Lber 09: Ka Mawlai SC kan ïoh ïa ka lad ban pynthikna ïalade kum ka lahduh jong ka OC Blue Shillong Premier League 2024 ha ka jingïalehkai ba kan ïakhun pyrshah ïa ka Laitkor SC mynta ka 10 tarik Lber, 2025 (sngi Nyngkong). Ka jingïalehkai kan long ha madan First Ground – SSA Stadium, Polo, ha ka por 3 baje nohphai sngi.
Ka Mawlai, kaba khlem pat mad ïa ka jingshah rem ha baroh shi lynter mynta ka samoi, ka la jop 14 sien na ki 16 tylli ki jingïakhun haduh mynta, ha kaba kiwei pat ki ar tylli ki jingïakhun ki la kut noh ha ka jingïakhaid.
Ka jingjop pyrshah ïa ka Laitkor kan pynbiang ïa ka Mawlai ban kynjoh 47 poiñ bad kan khanglad ïa ka Shillong Lajong FC kaba don ha ka kyrdan ba ar (42 poiñ) ba kan ban beh ïa ki.
Hynrei yn ym lah ban kheiñ sting ïa ka Laitkor. Watla ka dei ka samoi ba nyngkong jong ka ha ka OC Blue SPL hynrei ka la lah pat ban ïalehkai bha ha ki katto katne ki jingïakhun, kum ka jingïalehkai ba la jop da 2-0 kol ïa ka Rangdajied United FC ha u bnai ba la dep. Ki la ïakhun tyngeh pyrshah ïa ka Mawlai ha ka 1st leg bad ka la shah rem da ka said (da tang 1-0 kol). Bad ruh, ka Laitkor ka don ïa la ka jong ka thong kaba pynshlur ïa ki ban ïaid shakhmat – ka jingïakhaid kan kyntiew ïa ka na ka kyrdan kaba hynriew sha ka kyrdan kaba san ha ka miej kamai point, katba ka jingjop kan kham pynkmen shuh shuh namar kan ïoh ban pyndep ïa ka samoi SPL ba nyngkong jong ka ha ka kyrdan kaba saw.
Lada jia kumno kumno lait na ka jingjop na bynta ka Mawlai kamut ba ka jingïakhun na bynta ka nam lahduh jong ka OC Blue SPL kan long ha ka sngi ba khatduh, kata ha ka sngi Saitjaiñ, ha kaba kin ïakhun pyrshah ïa ka Lajong ban pynkut ïa ka samoi.
Ka Mawlai kaba dei ka kynhun ba bat ïa ka burom bad ka dang khmihlynti ïa ka hat-trick (ban rah lai sien lynter lane “three-peat”) kum ka lahduh jong ka OC Blue SPL, hadien ba ka la rah ha u snem 2022 (ka snem ba nyngkong jong ki hadien ba ki la kiew kyrdan biang na ka First Division) bad ha u snem 2023.
Ha kawei pat ka liang, ka Lajong, ka dei ka lahduh barim kaba la rah saw sien ïa ka SPL (2014, 2045, 2016 bad 2019) hynrei ka jingkyrmen ban rah ha ka sien ba san ka la lait noh na kti jong ki. Kin hap ban ap ïa ka resol jong ka jingïakhun mynta ka sngi, kumjuh ruh baroh ki riew ieid phutbol jong ka nongbah Shillong ka Laitkor, Mawlai bad kiwei kiwei.
