Shillong, Risaw, 20: Ki Pulit jong ka Umïam Police Station lem bad ki Pulit jong ka Umïam Fire and Emergency Service bad ka Search and Rescue Team (SRT) ki dang pynlong ka jingwad ïa kawei ka met jong uwei u rangbah ïa uba la suba ba u la noh ïap nalor ka jingkieng Umïam ha ka sngi Palei.
Katkum ka thymmei khubor ba la ïoh lum la ïathuh ba ki Pulit jong ka Umïam Police Station ki la ïoh jingtip ba ka don kawei ka kali taksi kamai kaba don ïa u number ML-05 Y 7753 kaba la pynieng hapdeng surok ha jingkieng Umïam bad ha ka jingleit tohkit ki Pulit ki la lap ba u shabi kali u dang don hapoh ka kali bad lap ruh ïa ka mobile phone bad ka jacket narud kane ka jingkieng. La ïathuh ruh ba la ieh noh ïa kane ka kali naduh ka por saw shiteng mynstep.
Kane ka jingjia ka la pynsuba ïa ki Pulit ba u nongniah jong kane ka kali u la leit noh ïap ha pung Umïam. Hadien kane, ïa kane ka kali, ki Pulit ki la tan noh sha Thanad bad ha ka jingwad bñiah, ki Pulit ki la lap ba une u rangbah uba la jah na kane ka jaka u dei uba la tip kyrteng kum u Skhemborlang Kharmawphlang, uba la 34 snem uba sah ha ka shnong Mawlai Matawar.
Kat haduh ba la pynmih ïa kane ka khubor, ki Pulit ka tnat Fire and Emergency Service bad ki dkhot jong ka Search and Rescue Team kim pat lap satia ïa ka met jong une u rangbah uba la suba noh ïap ha um bad na ka liang jong ki Pulit kin sa bteng biang ban wad ïa ka met jong u lashai ka sngi Thohdieng.
Na ka liang jong ki bahahiing hasem ki la ujor ruh da ka ejehar halor ka jingjah jong une u rangbah na kane ka jaka bad ka jingtohkit ki Pulit ka dang ïaid shakhmat ban lapdien ïa une u rangbah.
