Man la ka jaidbynriew ha kane ka sla pyrthei ka don la ka jong ka ktien ka thyllij kaba ki kren, ki toh ki tar bad dei lyngba ka jingdon jong ka ktien, ba ki jaidbynriew baroh ki im ki man bad ba ithuh ruh syndon ïa ki lyngba ki deity kaba ki don lang bad ki.
Haba phai sha la ka jong ka jaidbynriew, toi ka don ha ka shwa ïala ka jong ka ktien, hynrei ïaki dak ban thoh pat ïaki la saiñ dur pat ia ki da ki sahep mishonery ba wan sha sha shilliang duriaw, dei ka jingïoh ïa ki dak thoh, ba sa mih paw ïa ki khana pateng, ki puriskam bad bun bah kiwei pat ki jait jingthoh kum ka dak naka bynta ban buddien ïala ka jong ka thymmei jingwan ban long briew jong ka jaidbynriew Khasi ha kane ka sla jong ka pyrthei.
Pynban ha kane ka juk kaba mynta, kiba bun hi ki la sdang ban ïaid lait ne ban kiar ban kren ïala ka jong ka ktien, hynrei ki klet ba ka jingma ka long kaba la ap lypa namar ba kano kano ka jaidbynriew, kaba klet ne bym ithuh shuh ïala ka jong ka ktien, ka lah ba kan jah rngai noh shi syndon na kane ka sla jong ka pyrthei.
Shiban sngew shngaiñ ka mynsiem ban ïohsngew ïa ki riew shemphang kiba ïai long kiba peitngor bha da kumno ban lah ban pynneh ne ban pynsah ïa la ka jong ka ktien ka thylliej, ki da trei borbah ruh syndon naka bynta ban sam lem ïa jingang ka jingtip ka jong ki sha kiwei pat, khnang ba ka ktien kan ïai neh ïai sah, pynban hapdeng I jingtrei ba jar jar, sngew pat ban ong ba kiba bun ïa ka ktien lajong da lei lei kim man treh shuh ban kren ïaka. Hato aiu sha ha lyndet bym treh ban kren shuh ïala ka jong ka ktien…..? Hato don mo ka buit siant jongno re ban pynthame ne ban sait khuid na ka jabieng ban kynther jymbuiñ noh shi syndon ïala ka jong ka ktien…? Ban ïoh ia ka jubab jong kane baroh ka shong ha man uwei pa uwei na ki paid Kahsi baïar ba kin ïa thir ïa woh ne ban wad keiñ ïa ka daw tynrai ka jong ka.
Naka por sha ka por la juh pynlong ïa ki lympung ïaphylliew jingmut da kumno ban nang pynïar ïala ka ka ktien, pynban sngew pat ban ong ba kine ki lympung ki shu kut noh tang ha ki sawdong ki sawkun jong kita ki jaka ba la pynlong, hynrei ia kiei pat ki rai ba la shim, la ïeh noh pat ïaki shadien, kaba da kylla ka shu kut noh bad kata ka thong ban nang pynïar ïala ka ktien ka juh kut noh khlem poi shano shano ruh.
Haba jia ba hap ban leit sha kiwei pat ki jylla ba don kiwei kiwei pat ki jaidbynriew, ym lah ban khlem da sngew ïamrem ïalade haba shem bad ïohi ba kine ki jaidbynriew ki da nang ban burom bad ïeit thep mynsiem ïala ka jong ka ktien, kampher wat haba ki la kieng ha ka met ka longrynieng ka jong ki ïa kata ka jingstad bynriew kaba kordor, hynrei haba ki ïashong ïa pur khana hapdeng para maki, shi kyntien ruh da lei lei kin nym kren ne ban pynmih satia ïa ki kyntien nongwei, kane lypa ka dei keiñ ka nongmuna kaba kum ka jaidbynriew, kan hap ba kan bud ïa ki nuska ban pynneh ban pynsah ïala ka jong ka ktien ka thylliej ka jong ka.
Dei pat haba ïa ka ktien la kren, ba ka deity ka jong kine ki jaidbynriew ruh ka iai neh ka ïai sah, namar ban pynneh ïala ka jong ka deity, ka kamram kaba nyngkong eh dei ban lah ban pynneh ne ban kren ban khana pura shuwa ïala ka jong ka ktien. Pynban kum ka jaidbynriew, kumba ka la dep ba kan jia teng, imat ka por ka la wan poi biang, ba ka er-lang-thari kaba wan ban beh na sha shilliang duriaw mynta sa shisien ka la wan ba kan beh biang, kaba lymda skhem hi triang naduh na tynrai, ka khreh ba kan rong noh shi syndon ïa kane ka jaidbynriew na kane ka sla jong ka pyrthei.
Kumta, kum ka jaidbynriew, ka donkam ba kan kyndit bynriew noh, khreh ha kaban shim khia ban nym klet ïa la ka jong ka ktien ka thylliej, ïa kaba duna yn nang ïa trei shitom shuh shuh naka bynta ban pyndap ïa ka. Kum ka nuksa balei ba ka ktien phareng ka roi bad kren ïaka da kiba bun ki byriew ha ka pyrthei, ka daw ka long ba nalade shwa ka la lah ba kan pynneh ba kan pynsah bad ïa kaba duna ka bteng pat sa ba kan shim kylliang lem pat na kiwei pat ki jaidbynriew, kaba bteng ba kan nang ïai pynkhraw shuh shuh ïa ka ktien ka jong ka.
Lehse kam don jingeh ban ong ban nym nang shuh ban kren ïala ka jong ka ktien, hynrei kaba nyngkong eh ka dei shwa nala ka jong ka dohnud bad ka mynsiem, haba ka mynsiem ka rhem bad ka dap ba nga dei u Khasi uba pura, kan don jingeh aiu ban nym nang shuh ba ngan kren ïa ka ktien ka thylliej lajong, katno tam eh kata ka jingstad bynriew kaba la rung ha ka jabieng ba kan lah ba kan sait khuid noh tad haduh ban da klet syndon ban kren ïala ka jong ka ktien.
Pynban kiei kiei baroh ki paw pen ryngkew ba kum ka jaidbynriew, ka lip kata ka mynsiem sngew sarong ban ñiewkor iala ka jong ka ktien, haba la duh ka mynsiem sarong iala ka jong, tyllep pat keiñ sa ka jingsngew lehraiñ ne sngew bym nang shuh ban kren ïala ka jong ka ktien, hynrei haba mih pat shabar, haba kylli phi dei naei, da jyngngan ban mih keiñ ka jubab, namar haba ym nang shuh ban kren ïala ka jong ka ktien, kumno pat keiñ yn jubab ïala ka jong thymmei wan longbriew bad sdang ruh ban klet syndon ïala ka jong ka deity.
