Shillong, Naiwieng, 16: Ka Mawlai Town Dorbar (MTD) ka kynhun jong ki 17 tylli ki Dorbar Shnong kiba don hapoh ka jylli jong ka shnong Mawlai ha ka sngi Saitjaiñ ka la rai ban ym shah shuh ïa u Vice Chancellor jong ka skulbah NEHU u Prof. PS Shukla ba un dang wan rung shapoh u pud u sam jong ka shnong Mawlai.
Ka Mawlai Town Durbar ka la shim ïa kane ka rai hadien ka jingïakynduh bad ai mynsiem ïa ki samla pule ka skulbah North Eastern Hill University (NEHU) kiba dang pynlong ïa ka jingshah thngan la 12 sngi kynthih ban dawa hiar shuki ïa u Vice Chancellor u Prof PS Shukla bad ban dawa weng kam ïa u Registrar u Omkar Singh bad ïa u Deputy Registrar u Amit Gupta halor ka jingkynnoh ba la shu thungkam beain
“Kum ka Mawlai Town Dorbar ngi don ryngkat bad kine ki samla bad kano kano ka rai ka bym pynhun ïa ki samla pule ngin ai jingkyrshan lang,” u President ka MTD Bah Herlambok.
“U VC um dei shuh ban dang wan phai. Ngi ai ka jingkular ban ym pynkyllaiñ jyrwwit jyrwat ïa kane ka kam hangne, shu beh beit ïa u (Prof. Shukla) bad um dei shuh ban dang rung hangne khnang ba kan nym mih shuh kano kano ka jingjia ne kano kano ka jingïakhih kano kano ka jingktah ïa ka lawei jong ki samla pule bad ïa ka koit ka khiah ka jong ki.
“Lada u Vice Chancellor u dang wan phai biang, ka Mawlai Town Dorbar kan ym shah shuh ba un dang wan rung hapoh u pud u sam jong ka Mawlai Town Dorbar khamtam ha phyllaw jong ka skulbah NEHU kaba dang hap hapoh u pud u sam jong ka Mawlai Town Dorbar,” ong maham u President ka MTD.
Ha ka jingleit ïakynduh ïa ki samla pule, ïa ka kynhun jong ka Mawlai Town Durbar la lamkhmat da u President u Bah Herlambok War ryngkat ka jingsynran lang jong u Vice President u Bah Sorbar Lyngdoh Nongpyiur, u Secretary u Dr. Marco Mitri, u Asst. Secreetary u Bah Lumsyntiew Lyngdoh u Treasurer u Bah Kim Khongkliam ryngkat lang bad ki Rangbah Shnong jong ki 17 tylli ki Dorbar Shnong.
Ka Mawlai Town Durbar ha kajuh ka por ka la pynpaw ïa ka jingsngewkhia halor jingkoit jingkhiah jong ki samla pule kiba la shong shah thngan mynta la 12 sngi kynthih bad ka la ai jingmut ba kin shim noh da kiwei ki sienjam ban bteng ka jingkhih kaba shongnia.
