Ngin ym ailad ïa ki samla pule kin shah oh rem dor ban pule doktor ha jylla lajong: James K Sangma

Shillong, Nailur, 18: U Myntri ka tnad ka Koit ka Khiah ka jylla, James K Sangma u la ong ba kum ka sorkar jylla kin ym ailad satia ba ki samla ba kwah pule doktor kin shah oh khajna kaba heh haba ki kwah ban pyndep ïa ka jingpule ha la ka jong ka jylla.
Ïa kane u Myntri u pynpaw haba kynthoh kylla halor ka jingkren jong u Myntri barim ka tnad ka Koit ka Khiah ka jylla, Bah AL Hek u ba la kynnoh ïa ka sorkar jylla halor ka jingpyndam noh ïa ka soskular ban tei ïa ka Medical College ha ka PPP mode kaba ki la dep ban soi bad ka kompeni KPC ha u 2012.
“Hato lada kylli ïa u, u mynjur seh ba ki samla pule jongngi kin hap ban siew da ka dor ba heh ka bai pule. Na bynta jongngi ka sorkar kata kadei ka bym lah satia ban long. Kum ka sorkar ngi kwah ban pyntikna ba ki samla na ka jylla ba ka bai pule kaba ngi don naduh mynshwa kan ïai neh kumta namar bun kidei kiba wan naki longiing kiba duna ka ioh ka kot,” ong u Myntri haba kren bad ki lad pathai khubor.
Da kaba pynshai shuh shuh halor katei ka phang, u Myntri u la ong ruh ba ka KPC ka la kwah ban pynkylla bun ha katei ka soskular kynthup naduh ban pynkiew ïa bai pule doktor kaba pynlong ïa ka sorkar ba kan ym mynjur. Kawei pat kaba u ïathuh ka long ba ka rai jong ka sorkar ka pyndam noh ïa ka soskular ka long ba lada katei ka projek ka ïai bteng kumjuh lano lano ruh kin ymioh shuh ïa ka Medical College la ka jong.
“Dei na kane ka daw ngi la shim ïa ka rai bad ngi la ong ba kaei kaba la dep la dep hynrei nangne shakhmat ngi hap ban pynkhuid lut bad sdang beit da kaba thymmai ryngkat ki kyndon kiba biang bad kino kino ki kynhun kiba kloi ban treilang,” u la bynrap biang.
Haba jubab halor ka jingkylli ïa ka daw ka jingpynslem ban sdang shna ïa ka Shillong Medical College katba ka Tura College kala ïaid shakhmat bad dep haduh 33 persen, u Myntri u la pyntip ba kaba ha Tura kadei kaba la bei tyngka da ka sorkar bad kumta ïa ka jingkyrshan pisa la ioh na ka sorkar pdeng.
Tangba, u ong pat ba na bynta ka Shillong Medical College pat kaba pyntrei da ka Public-Private-Partnership mode, katba kim pat lah ban ïasoi ne pynbeit ïa ki kyndon treikam, kin ym lah satia ban sdang ïa ka kam.
“Dei na kine ki daw ba la sahkut lut ka kam bad khlem ioh sdang shuh haduh mynta. Kadei ka jingjia bym sngewtynnad namar lada ïa kum kane ka sienjam la dep ban leh naduh mynshwa, katta la lah ban pynbeit hynrei mynta la 10 snem ka por la shu pynlehnohei kai bad ngim pat ioh satia haduh mynta ïa ka Medical College.”
Da kaba pynpaw ïa ka jingsngewbynñiaw, u Myntri u ong ruh ba ka Meghalaya kadei sa tang ma ka, ka jylla kaba ym pat don satia la ka jong ka Medical College ha ka thaiñ shatei lam-mihngi jong ka Ri.
Shwa kane, u Myntri u la ong ruh ba u la dep ban kren ïa kane ka bynta wat ha Iing Dorbar ruh ba katei ka projek kala sahkut ha cold storage la 9-10 snem bad kane ka la ktah lang ïa ka por bad ka jinglut nalor ba ka pynduh nong ruh ïa kiba bun ki samla pule ka jylla kiba la dei ban ioh ïa ka jingmyntoi lada don ka Medical College la ka jong.