Ngin ym ailad ïa ki khun samla ka jylla ba kin shah lute ka lawei jong ki ha u drok: Conrad

Shillong, Jylliew 26: U Myntri Rangbah ka jylla u Conrad K Sangma, ha ka sngi palei, u la shim bynta ha ka porokram rakhe ïa ka International Day Against Drug Abuse and Illicit Trafficking hapoh ka State Convention Centre, Shillong ba la pynlong da ka tnat Social Welfare ha ka jingïatreilang bad ka Meghalaya Police, Meghalaya AIDS Control Society, and the Drug Reduction, Elimination and Action Mission (DREAM). Ha kane ka prokram la wan ban shim bynta da ki nongïalam, ki nongtrei ba hakhmat, ki nongïalam shnong kaba dei halor ka phang “Breaking the Chains: Prevention, Treatment and Recovery for All.”
Ha ka jingkren sdang, u Myntri Rangbah u la wanrah ïa ki roadmap kiba ïohi jngai ban ïakhun ïa ka jingsniew kaba mih na u drok ha Meghalaya. U la banjur ba ka sorkar ka angnud ym tang ban pyntreikam hynrei kumjuh ruh ban khmih ïa ka jingkoit jingkhiah da ki lad jingsumar, ka pule puthi, ka jingpyndon bynta ïa ki samla bad ka jingïatreilang kaba khlaiñ bad ki shnong ki thaw. U la ong, “Ngin ym lah ban peit ïa kane tang na ka bynta ka jingthaw bad ban pyntreikam ïa ki aiñ. Kadei ka kam ka koit ka khiah ki paidbah, ka imlang sahlang bad ka kam pynroi. Ka DREAM kadei ka kam jong ngi ban ïakhun lang kum ka jylla, bad kum ki briew.”
U Myntri Rangbah u la pynpaw ïa ka jingjop ka jylla ha ka ban pyntreikam ïa ki aiñ, ha kine ki snem ha kine ki 3 snem, ki pulit ka jylla ki la ïoh ban kurup T. 1,000 klur ka pisa tang na ki jingdih pynbuaid ba kynthup ïa u kynja, ka kiad bad kiwei kiwei. La don kumba 1,031 ka kam drok kaba la dep ban ujor bad la don palat 422 kiba la dep ban charge-sheeted. La pynkhlaiñ ïa ki unit ba kyrpang kum ka ANTF ba la dep ban pynkhlaiñ shuh shuh, ki tiar thymmai kum ki drug scanner bad ki squad ba la pyndep ban hikai.
U la kyntu ïa manla ki shnong, kiba hikai, ki nongïalam shnong, ki sengbhalang bad ki longïing ban wan lang halor kane ka jingïakhun. “Aiba ngin ym kdew kti naba ki samla ka Meghalaya ki dei ki atiar jong ngi bad ngin ym ailad ïa u drok ban un lute ïa ka lawei jong ki. Ngin ïa khun lang ïa kane ka thma bad ngin sa jop.”
Ha shwa ban pynkut ïa ka jingkren u Myntri Rangbah u la ïalam ïa ka jingshim smai kaba long ruh kum shi bynta jong ka National Nasha Mukt Bharat Abhiyan.
Ka Drug Reduction, Elimination and Action Mission (DREAM) – ka dei kaba bun rukom ba la sdang ban khmih ïa ka jingsupply bad ka jingdawa ïa u drok. Hapoh kane ka DREAM, ka sorkar ka la mang T. 50 klur ha ki 5 snem ban kyrshan ïa ki rehabilitation centre, khamtam kito ba la pynïaid da ki nongïalam niam bad ki shnong ki thaw. Ïa ki jingïarap pisa ba bynrap yn peit kat kaba donkam. Kum shi bynta na kane ka DREAM ka sorkar ka la ïasoi ïa ka Memorandum of Understanding bad ka Society for Promotion of Youth and Masses (SPYM).
Katba u Myntri ka tnat Social Welfare u Bah Paul Lyngdoh, haba kren kum u symbud kongsan u la ïaroh ïa ka tnat pulit ba ka la aiti ïa ka Anti-Narcotics Task Force (ANTF) kaba dei beit tang ban khmih ïa u drok bad ki kyndon ba la thaw hapoh ka NDPS Act na kiti kiba khaïi ba leh bun sien ka kam.
Ki Community Champions bad ki seng grassroot kiba la shim bynta ki long ka Life Care Foundation, United A’chik Society for Serving and Building the Nation, Japang NGO, A’chik Baptist Krima IV (Tura), Ka Lympung Ki Seng Kynthei, bad U-Matters Multipurpose Cooperative Society kiba la shah pynkup burom ïa ki jingnoh synniang, ki jingïada, ki jingai jingsumar bad kiwei ki kam.