Ngin ym ailad ban plie ïa ka karkhana saiñ nar kat bym pat ïoh ki jingdawa, ong ka shnong Rwiang
Pulom ka jingïakren ba khlieh khlieh tdong tdong ki nongpynïaid
Nongstoiñ, Ïaiong 03: Ki paid nongshong shnong ka Rwiang ryngkat bad ka jingkyrshan lang ka seng Meghalaya Comercial Trucks Owner and Driver Association West Khasi Hills District (MCTODAWKHD), mynta ka sngi ki la pynlong ka jingïakynduh lang bad ki nongpynïaid ka karkhana saiñ nar kaba don ha Rwiang kaba la tip kum ka M/s Shree Sha kambari Ferro Alloy Private Ltd. Ka jingthmu hi ka long ban ïakren haba ïadei bad ki jingdonkam ne ki jingdawa kaba ka shnong ka buh hakhmat katei ka Karkhana.
Ha kane ka sngi la ïadonlang u Arun Jain bad kiwei kiwei kiba la wan ban mih khmat na ka bynta katei ka Karkhana. Katba na ka liang ka shnong la ïadonlang u bah W.Ïawphniaw Sordar ka shnong Rwiang ryngkat kiwei kiwei ki nongkitkam ka shnong Rwiang, nangta u bah Moslandar Marngar bad kiwei kiwei ki dkhot jong ka MCTODAWKHD kiba la kyrshan radbah ïa ka shnong.
Ki katto katne ki jingdawa jong ka shnong ki kynthup ïa ka Sub Center, ka Skul, ka umbam umdih, ka khuid ka suba, ka thung kam thung jam kaba ïaid beit ïaid ryntih. Kumjuh ruh la dawa ban leit jurip lang ïa ka khuid ka suba ryngkat ka jingïadonlang ki bor ka District, kiba na ka tnad ka Environment, ki nongthoh khubor bad kiwei kiwei.
Ha kaba kut ka jingïakren kam shym la poi sha ka ban ïasngewthuh jingmut, namar ka shnong ka la kynnoh ba utei u Arun Jain u ba la mih khmat na ka bynta ka Karkhana, shiphang u la kam ïalade kum u trai, pynban sa shiphang u la kyntait ban long trai. Kumta ka shnong ka la dawa ba u ba dei trai hok un wan sha ka miej ka jingïakren bad katba ka shnong kam pat ïoh ïa kitei ki jingdawa kiba la buh ha khmat u Arun Jain lyngba ki jingthoh, ka Karkhana ym pat lah ban plie, ong ka shnong Rwiang.
Katba haba ïakren bad u Arun Jain u la ong ba ka jingdawa jong ka shnong yn leh bad yn ai ïa kita kaba ka Karkhana ka dei hok ban ai. Kumjuh wat ïa kiba ym dei hok ban ai ruh ka Karkhana kan khmih bniah la kan leh kumno, lym kumta ka Karkhana kan lah ban khangduh lada ym ai lad ban plie biang.