Ngin sa leit sha Delhi ban pynsngew ha u Union Minister ïa ka jingjia ha NEHU: AL Hek

Shillong, Naiwieng, 18: Ki nongïalam jong ka BJP Meghalaya State Unit ha ka Lah Sngi u Blei ki la leit jngoh ïa ki samla pule jong ka skulbah NEHU kiba dang ïai bteng ïa ka jingïakhih shah thngan mynta la 14 sngi kynthih ban dawa hiar shuki ïa u Vice Chancellor u Prof. PS Shukla.
Hadien ka jingïakynduh ïa ki samla pule, u MLA jong ka BJP u Bah Alexander L. Hek uba long ruh u Myntri jong ka Sorkar Jylla ha ka jingïakren bad u nongthoh khubor u la ong, “hadien ba la ïoh ïa ka shithi na ka MeTTA, na ka NEHUTA, ka NEHUSU bad na ka NEHUNSA ngi la phah ïa kine ki shithi sha u Myntri ka Sorkar Pdeng uba khmih ïa ka Ministry of Education bad na Delhi ki la phah ruh ïa uwei u nongmihkmat bad ha ka sngi sngi saitjaiñ ngi la don ka jingïalang bad ki katto katne ki Professor ban ïakren halor ki jingeh jong ka NEHU.”
“U nongmihkhmat uba wan na Delhi u la pdiang lut ïa ki jingujor bad mynjur ruh ïa kaei kaba la jia hapoh ka skulbah NEHU,” ula bynrap.
“Lada donkam, kum ka Party ka lah ban leit sha Delhi ban ïakren halor kane ka jingjia khnang ban pynkut noh ïa kane ka jingeh khamtam eh halor ka jingeh kaba ki samla pule ki ïakynduh,” la ïathuh u Bah Hek.
“Ngin sa leit pynsngew sha Delhi ïa kaei kaba la jia hangne ha skulbah NEHU ban ïakynduh markhmat bad u Myntri ka Ministy of Education ban ong ba kane ka kam, kam long shuh ban pynslem bad mar mar la donkam ban pynkut noh ïa kane ka jingeh,” la ïathuh u Bah Hek.
Haba kylli, u la ong, “kam dei tang ka jingduh ïa ki samla pule hynrei ka jingduhnong kaba khraw jong ka jylla bad ka thain Shatei Lammihngi baroh kawei.
U Nongaiktien jong ka BJP u Bah MH Kharkrang u la bynrap ba ka skulbah NEHU kaba ju paw shakhmat hynrei ka jinghiar ha ka kyrdan ka pynpaw ba ka don hi kaei kaei sha lyndet.