Shillong, Naiwieng, 18: Ka Meghalaya SSA School Association (MSSASA) ha ka Lah Sngi u Blei ka la dawa ïa ka Sorkar ba ka dei ban thaw da ka polisi ka ban pynskhem ïa ka kam jong ki nonghikai skul SSA.
Ka seng ka la aiti ruh ïa ki phra tylli ki jingai jingmut sha ka Sorkar ha ka jingïalang ba la khot da u Commissioner and Secretary ka tnat Pule Puthi ka Sorkar Jylla u Vijay Kumar Mantri ryngkat ka jingdonlang jong u Director ka State Education and Literacy u Swapnil Tembe bad kiwei kiwei ki ophisar jong ka tnat Pule Puthi.
Ha kane ka jingïalang la ïashim bynta lang ruh da ki nongïalam jong ka All Meghalaya SSA School Teacher Association (AMSSASTA) bad ka All Meghalaya Fourth Teachers Association (AMFTA).
“Ki jingai jingmut ki dei kijuh naduh ka por ba ngi la shong jingïalang bad ka State Education Commission (SEC) bad ka jingïakynduh ïa u Myntri ka tnat Pule Puthi bad ïa u Myntri Rangbah ka Jylla,” la ïathuh u President ka MSSASA u Bah Aristotle C. Rymbai ha ka jingïakren bad ki lad pathai khubor.
“Ngi la ai jingmut ïa ka Sorkar ba kan pynbeit thymmai ïa ka Meghalaya School Education Services Rule hadien ba ka Sorkar Jylla ka la mynjur ban pynjlan ïa ka rta rungkam jong ki nonghikai skul SSA ban ïoh hikai ha ki skul Sorkar naduh Lower Primary haduh Higher Secondary na ka 37 snem sha ka 45 snem. Ngi la ai jingmut ruh ïa ka Sorkar ban mang kyrpang ha kaba ïadei bad ki post ba lait nangne shakhmat ha kaba 70 persen ka dei ban long ïa ki nonghikai SSA ba la don ha ka kam bad 30 persen ïa kaba ju pynlong baroh shikatta,” la ïathuh u Bah Rymbai.
Ka MSSASA ka la ai jingmut ruh ïa ka Sorkar ban bynta ïa ki nonghikai SSA ha ki saw bynta. “Ban pynskhem lut ïa baroh ki nonghikai SSA yn ym lah. Dei ban buh ha ka bynta kaba nyngkong ïa kiba la biang ka kyrdan pule katkum ki kyndon ka NCTE ba la pynmih ha ka 23 tarik, Nailar 2010. Ngi la ai jingmut ïa ki nonghikai SSA kiba rungkam ha lane shwa ka 23 tarik, Nailar, 2010 bad ïa kiba rungkam ha lane shwa ka 29 tarik, Naitung, 2011 kiba la biang ka kyrdan pule bad ki bym donkam ban pyndep ïa ka Meghalaya Teachers Eligibility Test (MTET). Ïa ki nonghikai SSA kiba dang pyndep ïa ka kyrdan pule bad ka D.El.Ed., B.Ed., bad MTET ki bym pat pyndep ïa ka MTET. Ïa ki nonghikai SSA ki bym pat pyndep ïa ka D.El.Ed., B.Ed., bad MTET.”
“Ngi la ai jingmut ïa ka Sorkar ban pyllait noh ïa ki nonghikai skul SSA kiba rungkam ha lane shwa 23 tarik Nailar, 2010 bad ha lane shwa ka 29 tarik, Naitung, 2011 na ka eksamin MTET. Lada ngi peit ïa ki kyndon jong ka NCTE ba la pynmih ha ka 23 tarik Nailar, 2010 ka para 4 bad 5 ka thoh shai ba kino kino ki nonghikai kiba rungkam shwa ban pynmih ïa ka Jingpynbna kim donkam ban pas ïa ka Teachers Eligibility Test (TET) hynrei kin hap ban bud ïa ka jingpynbna kaba pynmih da ka NCTE ha ka 3 tarik Nailur, 2001,” la ong shuh shuh u Bah Rymbai.
U la ong ruh ba ka Seng ka la dawa ïa ka Sorkar ban pynlong la ka jong ka eksamin MTET ba kyrpang tang na ka bynta ki nonghikai skul SSA kiba la shakri ha ka kam la jan palat 20 snem khlem da pynïakhleh lang bad kiba dang thymmai.
“Lada kiwei ki jylla ki lah ban pynlong ïa ka eksamin TET ba kyrpang balei ym lah ban leh kumjuh ha Meghalaya,” la bynrap u Bah Rymbai.
“Nalor ka MTET, ngi la ai jingmut ïa ka Sorkar ban pdiang ïa ka CTET ïa kiba dang donkam ban pas ïa ka eksamin MTET. Ïa ki nonghikai SSA kiba la jan shongthait ka Sorkar ka dei ban wanrah ïa ka song jingïarap kaba kyrpang,” la ïathuh u nongïalam ka MSSASA.
Ka MSSASA ka la ai jingmut ïa ka Sorkar ban kyntiew ïa ka jingsiew tulop sha ki nonghikai skul SSA namarba katkum ki kyndon jong ka SSA la kdew shai ba ka dei ka kamram jong ka Sorkar Jylla.
“Ki kyndon ha ka RTE Act ruh ki kdew shai ba ka jingsiew tulop ka dei ban long kaba mar ïaryngkat bad ki nonghikai skul Sorkar,” u la ong.
