Shillong, K’Lyngkot 25: Ka Myntri ka tnad ka Koit ka Khiah ka sorkar jylla, Dr. Ampareen Lyngdoh ha ka sngi Palei ka la ong ba ki dang ap mynta ïa ka kaiphod na ka North Eastern Indira Gandhi Regional Institute of Health and Medical Sciences (NEIGRIHMS) halor ka jingkhlad jong ka samla ha katei ka jaka sumar dang shen.
Haba kren bad ki lad pathai khubor, ka Myntri ka la ong katba kam pat ïoh pdiang ïa ka kaiphod halor ka jingïap jong katei ka samla ha katei ka jaka sumar kam pat kwah ban kren ei ei.
“Mynta nga dap ap ïa ka kaiphod na katei ka jaka sumar bad kumta ngam kwah ba ngan kren ei ei katba ngam pat ïoh ïa ka kaiphod na ka NEIGRIHMS,” ka la ong.
Nalorkata, ka ong ruh ba watla katei ka jaka sumar ka hap ha ka jingpeit jong ka sorkar pdeng, hynrei kum ka sorkar jylla ka don la ka jong ka bynta, kata ban long ki shkor bad ki khmat ban peit ïa ka rukom treikam bad ban pyntip pat sha ka sorkar pdeng ban tuklar.
Ha kajuh ka por ka Myntri ka phah ruh ïa ka jingsngewlem sha ki bahaiing hasem jong kane ka samla kiba la mad ïa kum katei ka jingjia ba sngewsih.
