Shillong, Nailar, 21: U Nongïalam jongka BJP uba dei u National Executive Member bad Myntri sorkar ba mynshwa u bah A.L Hek mynta ka Sngi Thohdieng u la ong ba ym don ba bna hapoh ka party ba ka don ka jingthmu ban pynkylla nongïalam ha ka BJP hangne ha Meghalaya.
“ Ngim tip ne bna ei ei ruh halor kane ka jingthmu. Ha ka jingshisha ngi ïatrei lang kawei kum ki nongïalam ka party” ong u bah Hek.
U la ong ba kiei kiei baroh ki ïaid beit ïaid ryntih ha ka BJP bad kam don kano kano ruh ka jingïapher jingmut para nongïalam.
Haba la kylli hato kumno un rai lada tyrwa ba un shimti ïa ka kam President, u bah Hek u la jubab “ Ngi dei baroh ki Karyakartas bad ngi ïatrei lang baroh na ka bynta ka party bad ngin dang ïai trei lang baroh”.
U la ong biang ba baroh ki ïatrei lang ban pynkhlaiñ ïaka BJP ha kane ka jylla namar ki kwah ban ïoh ïalam ïa ka jingsynshar ha ka jylla hadien ka election MLA 2023.
Ha kaba ïadei bad ka jingthmu jongka sorkar ban buh ïaka Casino ha Ri Bhoi District u bah Hek u la ong ha ka jingshisha la dei ban dawa na ka sorkar ban buh shwa kawei ka stadium kaba heh ha Ri Bhoi.
“ Kumba ngi ïa rakhe ïa ka jingdap 50 snem ka jylla, ha ka jaka kata ka Casino la dei ban plie shwa da ka Stadium ha Ri Bhoi District namar ka Ri Bhoi ka dei kawei na ki district kaba kiew bha ha ki liang baroh” ong u bah Hek.
