Ngim pat tip uei u kyrtong ba biang jong ka HSPDP na Nongstoiñ

0

Nongstoiñ, Nailar 3: Ka jingpynsahteng jong ka Hill State People Democratic Party, ban pynbna ïa u kyrtong u ban ïakhun na ka Nongstoiñ Constituency ha ka election ka ban long ha u snem ban wan, ka la pynlynga bad pynpisa jingmut ym tang ïa ki paitbah nongkyrshan hynrei wat ïa ki nongïalam kiba kham ha khmat ruh, namar ka sur kaba mih na ki paitbah nongkyrshan bad ruh na ki nongkitkam jong ki shnat treikam kiba bun, ka long ba lada ka party ka ïoh ïa u briew u ba biang, kan dang lah lehse ban khie khlieh hynrei lada kam ïoh ïa u kyrtong ba biang te kam don jingmut shuh.
Ha kaba ïadei bad katei ka phang haba pyrshang ban twad jingmut na u bah T.Nongrem, uwei na ki nongkyrshan ba radbah jong ka HSPDP naduh ka por jong ka jingïakhih dawa Hill State haduh mynta, u la ong ba baroh ki nongkitkam jong ki shnat treikam hapoh ka Constituency, ki dang ap khmih lynti satang ïa ka por ban pynbna ïa ka kyrteng jong u kyrtong, namar ba satang hadien katto katne por yn sa pynbna noh.
Haba pyrshang ban twad jingmut na kiba bun ba lang pat, la sngewthuh ba ka HSPDP ha Nongstoiñ Constituency kan ym lah shuh ban khie khlieh lano lano ruh, namar ka jingbym don shuh ka jingïasngew thuh jingmut hapdeng ki para nongïalam. Ym lah ban len ba baroh ki nongïalam, jong ka party hapoh ka Constituency ki ong ba ki don hapdeng ka jingïatylli hynrei katei ka jingong jong ki ka dei tang na ka rmiang shyntur bad kaba shu pyllait jynhaw.
Kumba ka long haduh mynta la ïoh jingtip ba ki don saw ngut ki nongaplai tiket kata u bah Bobby Kharshandi u ba ïa ka kyrteng jong u dang ïohsngew dang tang ar snem duna ha Nongstoiñ, u bah Sanjiedkynsai Shangrit na Pyndengrei u ba la long teng u nongïalam sengbhalang, hynrei u la rung noh ha ka saiñpyrthei la kham katto katne snem, u bah G.Ningstar Myrthong uwei na ki nonghikai skul u ba la ju ïadon bynta ruh bad ki samla ha kiba bun ki kam, u bah L.Goodleaderson Nongsiej u MDC barim ka Nongstoiñ, u ba la jop ar sien arwat na ka HSPDP.
Napdeng kitei ki saw ngut ki nongaplai, ym don uwei ruh u ban ong ba lada un ïaleh ïa ka election un shah rem, hynrei baroh saw ngut ki sngew skhem triang ba kin poi sha ka jingjop. Hynrei napdeng jong ki, u ban ïoh ïa ka tiket u dei tang uwei te hato ki lai ngut ki bym ïoh kin hun bad kin kyrshan lut ïa u ba un jop ?

Leave A Reply

Your email address will not be published.