Shillong, Jymmang 01: U IG ki shipai BSF u OP Upadhyay ha ka sngi Palei u la ong ba ki shipai kin sa shim ka kam kaba donkam kaba long ruh halor ka nongrim jong ki lad syntiat halor ka jingrung jingmih jong ki lehnoh bad ki kynhun kaikhlaw ha shilynter ka khappud ka India bad Bangladesh.
Haba kren sha ki lad pathai khubor u Upadhyay u la ong ba ki shipai BSF kim shym la ïoh kino kino ki jingtip haba ïadei bad kine ki kynhun kiba treikam hapoh ka khyndew ka shyiap jong ka jylla Meghalaya ne ha kylleng ki jaka jong ka Meghalaya.
“Watla katta ruh ngi long barabor kiba peitngor bad ngi ïaibteng ban peit thuh halor kine ki jingmih bad lada don kino kino kiba kum kine ki jingjia lane lada ïoh kino kino ki kaiphod ki ban wan, ngin leh la ki kam kaba long kaktum ki jingtip ba ngi la ïoh,” pynthikna u IG.
Haba kylli halor ka jingdon ki camp jong ki kynhun lehnoh kiba mynta ba kynthup ïa ka seng HNLC ha Bangladesh, u IG ki BSF u la ong, “Nga thrai haba ïadei bad ka jylla Meghalaya, ngam tharai ba ngin don kine ki jingtip haba ïadei bad ki kynhun lehnoh hynrei ngi ïai pynlong ban peit khmih bad lada don kano kano kaba la wan sha ka jingtip jong ngi, ngin shim kam kloi kaba long ruh katkum ki jingtip ba la ïoh.”
“Na ka liang jong ngi, ngim don kum kita ki jingtip watla ngi la ïohi ïa kine tang lyngba ki lad pathai khubor kumta ngi dang pynshisha ïa kine ki kaiphod kiba la mih ha ki lad pathai khubor hynrei nga kwah ban pynthikna ba ngi la long kiba la pynkhreh pura ïa kumne kine ki jingjia. Ki rukom treikam bad ki tiar ïaleh ki la don katkum ba ka dei ban long bad ngin leh ïa kane ka kam katkum ki jinglong jingman,” u la bynrap.
