Ngi la ïakren bad SMB, nongmihkhmat ïa ki kam pynroi hynrei haduh mynta kim pat urlong: DS Mawkhar

Shillong, Jylliew 03: Ha Dorbar Shnong Mawkhar, hadien ba u Rangbah Shnong u Bah Arwan Tariang u la phah ïa ka shithi iehnoh kam na ka daw jong ka jingbym koit bym khiah jong ka met, ka Dorbar Shnong ha ka 29 tarik u Jymmang ka la jied noh ïa u Assistant Rangbah Shnong u Bah Ransom Sutnga kum u Acting Rangbah Shnong ban pynïaid ïa ki kam shnong kiba dangsah sa mynta kumba shisnem ha shwa ban kut kane ka samoi treikam jong kane ka Executive Committee ba mynta.
Haba kren bad u nongthoh khubor ha ophis treikam ka Dorbar Shnong ha ka jingdonlang katto katne ki Executive Member u Acting Rangbah Shnong u Bah Ransom Sutnga u la ïathuh ba hadien ba la ïoh ïa ka shithi iehnoh kam jong u Rangbah Shnong na ka liang ka EC ka la khot ïa ka dorbar ba kyrkieh na ka bynta ban jied ïa u Acting Rangbah Shnong ban pyntyllun ïa ki kam ba dangsah jong kane ka EC ba mynta.
“Hadien shisnem pat yn sa khot noh da ka dorbar shnong kaba pura khnang ban ïoh jied ïa u Rangbah Shnong ba pura jong ka Shnong,” ïathuh u Bah Sutnga.
Haba kylli, u Bah Sutnga u la ong ba ki dang don bun ki kam ba hap ban pynbha khamtam eh ban don ka shongsuk shongsaiñ ha ka shnong bad halor kane ki nongshong shnong ki lah ban ïakynduh ïa ki nongkitkam ka shnong manla ka sngi baar jong u taïew khnang ban pynsuk ïa ki jingdonkam ki nongshong shnong.
“Ngin don ruh ka rukom treikam kaba thymmai bad manla ka sngi baar naduh ka por 9 baje haduh ka 10.30 shiteng baje mynstep ki nongshong shnong ki lah ban kynduh ïa ki nongkitkam ha ophis treikam,” u la ong.
Haba ïadei pat bad ki kam pynroi kiba ka shnong ka dang donkam u la ithuh, “Halor ki kam pynroi bun kiei kiei kiba dang donkam khamtam eh ba ka Mawkhar ka dei ka pdeng Sor, kawei kaba donkam eh kadei ki Nala shnong namarba ki dei kiba la rim. Ngi la ïakren ïa ki tnat sorkar naduh ka Shillong Municipal Board, nongmihkhmat hynrei haduh mynta ym pat lah ban pynurlong ïa ki kam, namar ki Nala ki dei ruh kiba ktah ïa ka koit ka khiah, nangta pat ki pipe um kiba ïaid najrong ka surok kiba dei ki kam kiba hakhmat, nalor ka khuid ka suba.”
Haba ïadei bad ki kam sniew kiba mih na Motphran kiab dei ki kam jingïaleh na ka liang ka shnong, u Bah Sutnga u la ong, “Ka Mawkhar kan dei ka shnong kaba nyngkong ban pyndait da ki CCTV khnang ban ïoh peit pyrman ïa kino kino ki kam sniew khnang ban long ka jingbha ïa ka shnong bad ban pynneh ïa ka shongsuk shongsaiñ.”
U la ïathuh ruh ba ka Dorbar Shnong ka la pyrkhing bha ha kaba ïadei bad kiba shongdie jingdie ha madan ha ki lynti syngkien namar kane ka pynthut ïa ka ïaid lynti jong ki paidbah.
Haba ïadei bad ka jingpynïeng kali kulmar ha surok shnong u Acting Rangbah Shnong u la ïathuh ba la buh haduh 7 ne 8 ngut kiba trei monsngewbha ban peit ïa ka rukom pynïeng kali hapoh shnong.
Namarba ka Mawkhar ka don haduh 4 tylli ki skul kaba ki khynnah skul ki ju ïaid lynti bha, u Acting Rangbah shnong u la ïathuh ba ka Dorbar Shnong na ka por sha ka por ka ju khot ïa ki nongpynïaid skul ban bthah ba ki khynnah skul kim dei ban bret jaboh pathar ïa ki lynti shnong.
“Mynshwa ka shnong ka la ju buh ïa ki garbage bin hynrei kaba sngewsih ka long ba ha kine ki jaka bret ñuit la ju lap ba kito kiba ju leh ki kam sniew ha ki por mynmied ki bret ïa ki jakhlia kiba ym ruh ban peit bad dei halor kane ka daw ba ka shnong ka khlem buh shuh ïa kine ki garbage bin,” u la bynrap.
Katba u Bah K Basaïawmoit Assistant Rangbah Shnong haba bynrap u la ai ka jingkitbok kit rwiang ïa u Rangbah Shnong barim u Bah Arwan Tariang ba un ïoh noh ka met kaba koit ba khiah khnang ba un lah ban ïatreikam biang bad ka shnong bad u la kitbok ruh ïa u Acting Rangbah shnong ba un danglah ban pyntyllun ïa ki kam kiba dangsah jong kane ka samoi treikam ba satang shisnem.