Ngi kyrshan pura ïa ka jingdawa u Bah Ardent ban pynbeit ïa ka Bhah Thungkam, ong u Bah R.S.Sohlang

Nongstoiñ, Jymmang, 25: “Ka jingshah thngan khlem pud sngi jong u bah Ardent Miller Basaïawmoit President ka Voice of Peoples Party, namar ka jingbym sngap jong ka sorkar ïa ka jingdawa jong u ba kan pynbha noh ïa ka bhah thungkam, ka dei ka jingdawa kaba shong nongrim bad kaba biang por bha. Kane ka mat ka dei kaba baroh ki paitbah nongshong shnong ha Khasi Jaiñtia kin ai ka jingkyrshan ba pura”, ong u bah R.S.Sohlang sordar barim ka shnong Markasa ryngkat kiwei pat ki riew rangbah kiba paw bha ha West Khasi Hills.
Haba ïakren bad u nongthoh khubor u la ong ruh, “Katei ka mat jingdawa ka dei kaba donkam haduh katta katta. Hynrei kam dei pat ban kylla long ka ishu politik, namar wat la ki paitbah ki kyrshan pura ruh, ym baroh ki dei kiba kyrshan ïa ka VPP hynrei ki dei ki nongkyrshan ba rad bah jong kiwei pat ki political party”.
U la ong ruh, “Ka long kaba lyngngoh pat ban ïohi ba ki don bun bah ki nongshong shnong kiba pynkylla ishu politik pynban, da kaba kynnoh laiphew jait ïa ki MLA jong ki party kiba leit kyrshan ïa ka sorkar namar ka jingbym kren ei ei jong ki halor ka jingdawa jong u bah Ardent. Katei ka jingpynlong ishu politics jong kiba bun kam long kaba dei, namar katei ka ishu ka dei na ka bynta jong ka jaitbynriew”.
“Kan bha shibun kin ai jingmut ïa ki MLA jong ki, ba lada ka sorkar ka sngew eh ban pynbha bad pynthymmai ïa ka bhah thungkam, ka la dei ban pynduh noh ïa ka reservation policy da kaba mynjur lang ba baroh ar tylli ki bhah thungkam kata Khasi Jaiñtia bad Garo kan long 80% khlem da kheiñ shuh lada udei na kano kano ka jaitbynriew ruh. Hynrei jar u ba stad bad uba la biang ka kyrdan pule un ïoh beit ïa ka kam ym kumba ka long mynta ba u Garo lada un ïoh tang 60% ka marks ruh u la ïoh lad ban leit pule Doctor. Katba u Khasi Jaiñia pat wat lada ki ïoh 85 haduh 90 % ka marks ruh bun ki bym ïoh ban leit pule Doctor hynrei lada pynduh noh ïa ka 40 % Garo 40 % Khasi Jaiñtia bad yn shu pynlong compoulsory noh 80% kiba stad te kin ym duh kam satia”.
“Lada ka sorkar ka sngew eh ka dei ban pynbeit noh ba ka bhah thung kam ka long katkum ki District Council Jurisdiction namar ki Garo ki don ïa ka GHADC, ki Khasi ki don ïa ka KHADC bad ka Jaiñtia ka don ka JHADC. Ki la ong ruh ban ïa kaba pynklumar ïa ki paitbah kan jin da la bha ban pynbeit noh khamkloi katba lah khnang ba ki paitbah kin hun bad kin ym artatien”, u la ong.