Ngi kren shai ba ngim pdiang ïa ka surok rel katba ym pat pyntreikam ILP ha ka jylla: KSU

Shillong, Jylliew 25: Ka Khasi Students’ Union (KSU) ha ka sngi Saitjaiñ ka la phah da ka kyrwoh kaba shai sha ka sorkar jylla ba ka seng kan ym pdiang da leilei ïa ka surok rel ha ka jylla la kan dei tang na bynta ki rel kit mar ne rel kit briew kumjuh katba ym pat lah ban pyntreikam ïa ka ILP ban long kum ka stieh ïada na ka jingwan buhai shnong kyrthep ki briew kiba na bar jylla.
“Ngi kren da kaba shai kdar ba da leilei ngim pdiang ïa ka rel katba ym pat lah ban pyntreikam ïa ka ILP ha ka jylla ban long ka stieh ïada ïa ka jaidbynriew bad lada ka sorkar ka thom da kaba bor halor kane ngim salia ban tyngkhuh bad ka la ha kano ma kano ka dur ruh hynrei ngin pynthikna ba ka surok rel kam dei ban wan shuwa ba ki aiñ ba khlaiñ ban ïada ïa ki mynder ri kin treikam”, ong u Bah Lambok haba kren sha ki lad pathai khubor.
“Ka KSU ka kren shai ba Em te em ïa ka lynti rel kumba long mynta lada ym pat wanrah ïa ki aiñ ba khlaiñ hynrei tad ynda ki aiñ ki la don ngi kloi ban ïatai ïa kane ka mat ba balei donkam ban wanrah lynti rel ha kata ka por ngi kloi ban ïakren bad ngim kwah ban ong eiei palat ïa kata nga ngeit ka sorkar ka sngewthuh aiu kan jia lada ka thom da ka bor”, u la bynrap.