Shillong, Naitung, 13: U President jong ka Voice of the People Party (VPP) Bah Ardent Miller Basaïawmoit uba dei ruh u MLA jong ka Nongkrem Constituency ha ka sngi Saitjaiñ u la ther tyngeh ïa u nongïalam jong ka Liang Pyrshah u Bah Ronie V. Lyngdoh uba dei ruh u Nongïalam jong ka Congress Legislature Party (CLP) ha Ingdorbar Thawain ka Jylla da kaba ong ba u dei tang u nongïalam u bym pat kot ban long u nongïalam hynrei u dei tang uba shu kwah ban jop ïa ka elekshon.
Kane ka jingkynthoh jong u Bah Ardent ka long hadien ba u Bah Ronnie u la kynnoh ba ka Voice of the People Party (VPP) kaba la pynkhreh ban ïakhun sa ïa ka elekshon MDC ka ban sa long shen ka dei ka party kaba kwah pynduh noh ïa ka Sixth Schedule da kaba dawa ban wanrah bujli ïa ka Article 371 jong ka riti synshar ka ri India.
“Ka party kaba kwah ban pynduh noh ïa ka Sixth Schedule, mynta kane kajuh ka party ka kwah ban ïakhun ïa ki elekshon jong ki Autonomous District Council. Kane ka long kaba thamula bad ngim lah ban sngewthuh ïa ka jingpyrkhat kaba shalyndet jong ka,” ong u Bah Ronnie ha ka jingïakren bad ki lad pathai khubor ha ka sngi Thohdieng.
Haba kynthah ïa u Bah Ronnie, ha ka jingïalang ai khublei sha ki nongkyrshan jong ka VPP kaba ka long ka shnong Mairang halor ka jingjop jong u Dr. Ricky AJ Syngkon ha ka elekshon Lok Sabha ba dang shu dep long shen, u Bah Ardent u la ong, “kum u (Bah Ronnie V. Lyngdoh) la klet ha u snem 2019 u la wan ban khroh ban kjor ïa nga ba ngan ïarap lem ïa u ba un jop ïa ka elekshon MDC ha u snem 2019. Nga la ïarap bad u la jop ïa ka elekhon MDC 2019. Nga nud ban ong, lymda dei ba nga ai jingkyrshan un ym jop ïa ka elekshon MDC. Lada nga dei u briew uba pyrshah ïa ka District Council balei ngan leit ïarap ban ïalap elekshon MDC ïa kiwei.”
“Ka long ka pop ban ïalam bakla ïa u paidbah,” u la ong.
“Lada ki sngew ba ka District Council kaba ki kren na ka por sha ka por ka la biang ban ïada ïa ngi ka jaidbynriew balei kim lah ban ïada ïa ki paidbah haba ka wan ka aiñ kaba khang ïa ki paidbah nongshong shnong ba kin tih maw kin tih shyiap, balei kim lah ban ïada haba ka wan ka aiñ kaba khang ban pom dieng, balei kim lah ban ïada haba ka wan ka aiñ kaba khang ban tih dewiong, balei phi kwah ban pynbiej ïa u paidbah,” la pynphai nia kylla u Bah Ardent ïa u Bah Ronnie.
Da kaba pynksan halor ka jingdawa ïa ka Article 371, u President jong ka VPP u la ong, “ngi ïohi ïa ki jingeh kiba ka jaidbynriew ka mad, ka wan ka jingkhang tih dewiong, ka wan ka jingkhang pomdieng, ka wan ka jingkhang tih maw tih shyiap. Kine ki dei ki aiñ jong ka Sorkar India. Ym don District Council ym don Sorkar Jylla kiba lah ban ïada ïa u paidbah. Dei namarkata, ngi donkam ban wad ïa ki lad jingïada ki ban ïada ïa ngi na kita ki aiñ jong ka Sorkar India kiba ktah ïa ka ïoh ka kot ka jong ngi, kiba ktah ïa ka rukom trei ka rukom ktah ka jong ngi, kiba ktah ïa ka rukom im ka jong ngi. Dei namarkata kata ka daw, ngi ong ba ngi donkam ïa ka Article 371, dei kane ka aiñ ka ban ïada ïa ngi.”
U la kyrpad ruh ïa ki paidbah ba kin ai ka jingshaniah ha ka Party ym da ka jingshaniah matlah namarba kum ka party ka don ïa ka jingïohi jngai ban ïa kita kiba kam nongïalam ha kane ka jylla.
Haba kynthoh shuh shuh ïa u Bah Ronnie, u nongïalam jong ka VPP u la ong, “kim pat long kiba bit ban long kum ki nongïalam namarba ki dei tang ki nongïalam jop elekshon. “Tang ban shu jop elekshon ïalam bakla ïa u paidbah, ynda la jop elekshon pat khlem lah ban leh eiei na ka bynta u paidbah. Ngi, ngim kwah ban long ka seng kaba shu ïalehkai elekshon, ngi kwah ban long ka seng kaba u paidbah u la ai jingshaniah ngin ïada ïa u paidbah bad ban kyntiew ïa ka ri jong ngi lyngba ki aiñ kiba khlaiñ,” la bynrap u Bah Ardent.
