Shillong, Naiwieng 27 : U MLA ka Shillong North, Bah Adelbert Nongrum u la byrngem ban mih noh na ka sorkar lada jia ba ka sorkar ka buh teng bad pynslem ban buh ïa ka ktem pulit kaba khlaiñ ha Mukroh ban ïada ïa ki paid khappud kiba don mar syndah bad ka jylla Assam.
Katei ka jingdawa jong u kadei hadien ka jingduhei jong ki hynriew ngut ki mynsiem briew kynthup ïa san ngut ki rangbah Khasi kiba la kyllon ïap ha u kuli jong ki pulit Assam ha Mukroh.
“Lada ka sorkar kam nud ban buh ïa ka Outpost kaba khlaiñ ban ïada ïa ki paid khappud na ka jingthombor jong ka Assam, nga kloi ban weng noh ïa ka jingkyrshan na ka sorkar,” ong utei u MLA.
Shuh shuh u ong ruh ba ka Meghalaya kam dei shuh ban shu shah jem hynrei ka la dei ka por ba kan ieng rangbah ban ïada ïa la ki jong ki nongshong shnong lada jia ba ka Assam ka dang ïai bteng ban thombor.
Utei u MLA u la ïathuh ruh ba dang shen u la leit hi dalade sha katei ka thain ba jia ka jingshah thombor kitei ki lanot ban leit sngewlem sha ki bahaiing kiba kynduh ïa katei ka jingjia ha ryngkat ka jingdonlang ki nongïalam shnong, MLA bad MDC ka thain nalor kiwei kiwei. Kumban shu kdew hangne, naduh ka sngi ba kitei ki rangbah ki shah siat ha ki pulit Assam, ka jylla ka la don ha ka jingmih paidbah kaba harukom ha kaba ki seng ki mih ban pynpaw ïa ka jingpynrem halor ka jingthombor jong ka Assam ïa ki paid khappud bad ha kawei ka liang ruh ban dawa na ka sorkar Meghalaya ba kam dei satia ban thiah thai halor katei ka bynta.
